2016 jyldyń birinshi jartyjyldyǵynda ınflıatsııa 4,6%-dy qurady - QR Ulttyq banki

ALMATY. QazAqparat - 2016 jyldyń birinshi jartyjyldyǵynda ınflıatsııa 4,6 paıyzdy qurady. Bul týraly búgin QR Úkimetiniń otyrysynda «Qazaqstan Respýblıkasynyń áleýmettik-ekonomıkalyq damýynyń jáne memlekettik bıýdjetiniń atqarylýynyń 2016 jylǵy 6 aıdaǵy qorytyndylary týraly» másele boıynsha baıandama jasaǵan QR UB Tóraǵasynyń orynbasary Ǵalymjan Pirmatov málim etti.

Ol óz baıandamasynda ınflıatsııalyq kútýlerge qatysty maýsym aıynda júrgizilgen saýalnama nátıjesinde alynǵan derekterdi keltirdi.

Sonymen, aldaǵy 12 aıda ınflıatsııanyń jedeldeýin nemese onyń aǵymdaǵy deńgeıde saqtalýyn kútetin qazaqstandyqtardyń úlesi naýryzdaǵy 42,2 paıyzdan 36,3 paıyzǵa deıin tómendegen.

Sondaı-aq, QR Ulttyq banki baspasóz qyzmetiniń habarlaýynsha, Ǵalymjan Pirmatov óz sózinde 2016 jylǵy qańtar-maýsym aralyǵynda ınflıatsııanyń 4,6 paıyz deńgeıinde qalyptasqandyǵyn atap kórsetti.

«Sońǵy aılary ınflıatsııa is júzinde kútýler men boljamdarǵa tolyǵymen sáıkes keledi. Al bul, barynsha yqtımaldylyqpen 2016 jyldyń qorytyndysy boıynsha jyldyq ınflıatsııa boıynsha 6-8 paıyzdyq nysanaly dálizge qol jetkiziledi jáne ol kelesi jyldyń sońyna deıin saqtalady dep paıymdaýǵa tolyǵymen negiz bola alady», - dedi Ǵ. Pirmatov.