2016 jyldyń 1 toqsanynda ónerkásip ónimderin óndirý 21,9 paıyzǵa ósti - ShQO ákimi

ÓSKEMEN. QazAqparat - Shyǵys Qazaqstan oblysynda aǵymdaǵy jyldyń 1 toqsanynda ónerkásip ónimderin óndirý kólemi 21,9 paıyzǵa ósti. Bul týraly búgin «Memleket basshysynyń 5 ınstıtýttyq reformasyn júzege asyrý boıynsha 100 naqty qadam» Ult josparyn júzege asyrý máselelerine arnalǵan brıfıng barysynda óńir basshysy Danıal Ahmetov málim etti.

«Aǵymdaǵy jyldyń 1 toqsany aıaqtaldy. Іshki jáne syrtqy faktorlardy qosa alǵandaǵy jalpy óńirlik ónimniń ataýly kólemi 500 mlrd teńgeden asatyndyǵy kútilýde. Bul 2015 jylǵy kórsetkishpen salystyrǵanda 102 paıyzdy quraıdy. Ónerkásip ónimi kólemi 301 mlrd teńgeni nemese 121,9 paıyzdy, aýyl sharýashylyǵy jalpy ónimi 30,1 mlrd teńgeni nemese 105 paıyzdy qurap otyr», - dedi D.Ahmetov.

Onyń aıtýynsha, bıyl Shyǵys Qazaqstan oblysynda 65,7 myń sharshy metr turǵyn úı paıdalanýǵa berilmek. Ósim - 3,5 paıyz. Birinshi toqsannyń qorytyndysyna sáıkes memlekettik bıýdjetke 49,9 mlrd teńge salyq pen tólemder aýdaryldy. Bul 2,5 paıyz ósimdi quraıdy. Onyń ishinde jergilikti bıýdjetke 22,3 mlrd teńge aýdarylyp otyr. Bul da ótken jylǵy kórsetkishpen salystyrǵanda 110,4 paıyzǵa artyq.

Sonymen qatar ákim óz sózinde óńirde «100 naqty qadam» Ult josparyn oryndaý jumystary Elbasynyń «Qazaqstan jańa jahandyq naqty ahýalda: Ósim, reformalar, damý» atty Joldaýyndaǵy tapsyrmalarǵa saı júrgizip jatqanyn, ekonomıka ósimin qarqynyn saqtaýǵa, myǵym áleýmettik kepildi qamtamasyz etýge baǵyttalǵan atap ótti.