2016 jyldyń 1 shildesine deıin birqatar oblystar jergilikti bıýdjet qarjysy esebinen nan baǵasyn retteı alady - S.Omarov
«Sizder bul baǵdarlamany jaqsy bilesizder. Bul baǵdarlama 2009 jyly bastalyp, osy kúnge deıin jalǵasýda. Alǵashqy sátte astyqty qaıta óńdeıtin kásiporyndar úshin astyq naryqtan tómen baǵamen memlekettik qordan bólinip keldi. Odan keıin barynsha naryqtyq ádiske kóshý qajettiligi týyndaǵannan keıin 2013 jyldan bastap astyqty qaıta óńdeıtin kásiporyndar satyp alatyn astyq qunyn sýbsıdııalaý qolǵa alyndy. Máselen, astyqty qaıta óńdeıtin kásiporyndar astyqty naryqtan belgili bir somaǵa satyp alady. Al aıyrmasy belgili bir baǵaǵa deıin memleket esebinen sýbsıdııalandy. Bastapqy sátte sýbsıdııa kólemi astyqtyń 1 tonnasyna 18 myń teńgeni qurady. Al aǵymdaǵy jyldyń qańtarynan ol 14 myń teńgeni qurady. Ekonomıkany jańǵyrtý jónindegi komıssııa otyrysynda birtindep sýbsıdııa kólemin tómendetý arqyly nan baǵasyn kóteremiz degen sheshim qabyldandy», - dedi ol. Vıtse-mınıstrdiń atap ótýinshe, sondyqtan da jergilikti atqarýshy organdar men naýbaıhanalarǵa toqsan saıyn bir bólke baǵasyn 1,4 teńgege qymbattatýǵa múmkindik berilgen. «Bastapqyda sýbsıdııa kólemi tonnasyna 18 myń teńgeni qurasa, aǵymdaǵy jyldyń qańtar aıynda onyń kólemi 5 myń teńgege deıin tústi. Al bul rette nan baǵasy ózgerissiz qaldy. Jalpy, bul baǵdarlamany júzege asyrý úshin aǵymdaǵy jyly 11,5 mlrd. teńge bólingen bolatyn. Buǵan deıin jyl saıyn shamamen 6-7 mlrd. teńge bólinip kelgen. Aǵymdaǵy jyly soma úlken. Sebebi, buǵan deıin baǵdarlama 4-5 aı kóleminde júzege asyrylsa, al bıyl baǵdarlama 9 aıǵa sozyldy», - dedi S.Omarov. Onyń sózine qaraǵanda, sol sebepti memlekettik komıssııa 2016 jyldyń 1 qańtarynan nan baǵasyn sýbsıdııalaýdan bas tartý týraly sheshim qabyldanǵan. Sebebi áleýmettik nandy baı da, kedeı de satyp alady. Endigi ýaqytta áleýmettik turǵyda az qamtylǵan otbasylarǵa áleýmettik kómek tetigi engizilmek. Bul shara memleket qarajatyn biraz únemdeýge de múmkindik beredi. Aldyn ala esepteýlerge sáıkes áleýmettik kómekke jylyna shamamen 2 mlrd. teńge qajet bolady. «Barlyq naýbaıhanalarǵa nan baǵasyn kóterýge múmkindik berildi. Biraq kóptegen oblystar bul múmkinshilikterin paıdalanǵan joq. Sondyqtan da olarǵa 2016 jyldyń 1 shildesine deıin jergilikti bıýdjet qarjysy esebinen nan baǵasyn retteýge múmkindik beriledi», - dedi ol.