2016 jyldyń 1 qańtarynan bastap elimizde múgedekterdiń járdemaqysy 25 paıyzǵa kóteriledi - T. Dúısenova
Qujatty talqylaý barysynda depýtat Murat Baqtııaruly múmkindigi shekteýli azamattar tarapynan túsetin ótinishterge nazar aýdarǵan bolatyn. «Qazaqstanda 1-toptaǵy múgedekterge beriletin járdemaqy 33 myń 292 teńge nemese 123 dollar. Kórshi Ózbekstanda 143 dollar, soǵys júrip jatqan Ýkraınada 170 dollar, al Reseıde 209 dollar, Belarýste 224 dollar, Ázerbaıjanda 189 dollar eken. Nege mundaı aıyrmashalyq bar?» - dep surady senator.
Óz kezeginde mınıstr Tamara Dúısenova Reseı men Belarýs elderine qaraǵanda Qazaqstannyń járdemaqy taǵaıyndaý júıesi ártúrli ekenin alǵa tartty. «Biz 1999 jyldan bastap múgedekterge kepildendirilgen járdemaqy tólep kelemiz. Atalǵan eki elde bul zeınetaqy túrinde belgilengen, burynǵy eńbekaqylaryna qaraı esepteledi. Ekinshiden, biz múgedektigi boıynsha járdemaqyny zeınetke deıingi jasyna tóleımiz, al zeınet jasyna jetkende zeınetaqy tóleıtin bolamyz. Bul jóninen biz eń tómengi zeınetaqy mólsheri boıynsha basqa memleketterden joǵary turmyz, al ortasha zeınetaqy mólsherinde Reseıden keıingi ekinshi oryndamyz», - dedi T. Dúısenova.
Onyń aıtýynsha, elimizde 627 myń múmkindigi shekteýli azamat bar, sonyń 47 myńǵa jýyǵy 1-shi toptaǵy múgedek.
«2016 jyldyń 1 qańtarynan bastap biz barlyq múgedektigi jónindegi járdemaqyny 25 paıyzǵa kóterip jatyrmyz. 2018 jyldan bastap kúnkóris deńgeıiniń ádistemesiniń ózgerýine baılanysty bul qosymsha 18 paıyzǵa artady. Osylaısha, túıindeı aıtqanda 2018 jyly bul járdemaqy búgingimen salystyrǵanda eki esege jýyq joǵarylaıtyn bolady», - dedi T. Dúısenova.