2016 jyldan bastap múgedektik boıynsha járdemaqy kólemi artady

ASTANA. QazAqparat - 2016 jyldyń 1 qańtarynan bastap múgedektik boıynsha memlekettik áleýmettik járdemaqy mólsheri 25 paıyzǵa artady.

Sonymen qatar aqparattyq júıeler arqyly bir ótinim boıynsha múgedekter úshin birneshe memlekettik qyzmetterdiń nátıjelerin alý múmkin bolady.

Bunyń aldynda habarlaǵanymyzdaı, QR Densaýlyq saqtaý jáne áleýmettik damý mınıstrligi halyqqa áleýmettik qyzmet kórsetý júıesin ary qaraı reformalaý aıasynda 2025 jylǵa deıin arnaıy áleýmettik qyzmet kórsetýdiń biriktirilgen modelin engizýdi josparlap otyr.

Jańa model aıasynda muqtaj adamdar men olardyń otbasylaryna jeke jáne keshendi qamqorshylyq ustanamy júzege asyrylady. Ol úshin bilim berý, densaýlyq saqtaý jáne áleýmettik qorǵaý júıeleriniń, sondaı-aq basqa da salalardyń áleýmettik jumysshylarynyń qyzmetin úılestirý tetigi jasalmaq. Bul óz kezeginde «bir tereze» arqyly muqtaj adamdarǵa áleýmettik qyzmetter kórsetýge múmkindik beredi.

Qazirgi kezde saýyqtyrýdyń tehnıkalyq tásilderi tizbesin ózektendirý úshin usynystardy jasaý turǵysynda tıisti sharalar atqarylýda.