2016 jyldan 100 paıyzdyq spırttiń 1 lıtrine aktsızdik mólsherleme 1380 teńgege deıin tómendetiledi
ASTANA. QazAqparat - Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine salyq salý jáne kedendik ákimshilendirý máseleleri boıynsha ózgerister men tolyqtyrýlar engizý týraly» QR Zańy qabyldandy. Qujat «100 naqty qadam» Ult Josparynyń 39-, 65- jáne 67-qadamdaryn iske asyrý, sondaı-aq salyqtyq jáne kedendik ákimshilendirý tetikterin jetildirý jolymen qolaıly kásipkerlik ortany qalyptastyrý maqsatynda ázirlengen bolatyn.
Zańda salyq saıasaty boıynsha birqatar sharalar qamtylyp otyr. Máselen, qosylǵan qun salyǵy boıynsha tirkeý esebine turýdyń shekti mólsherin 59,4 mln. teńgeden 6,4 mln. teńgege tómendetý, taýarlardy ımporttaý kezinde qosylǵan qun salyǵy esepke alý ádisimen tólenetin normalardyń qoldanylý merzimin 2022 jylǵa deıin uzartý, jeke kásipker retinde tirkeý alymyn tóleýdi alyp tastaý qarastyrylady. Budan bólek, geologııalyq barlaý jumysy kezeńi ishinde jınalǵan qosylǵan qun salyǵyn bes jyldyń ishinde qaıtarý kózdelip otyr.
«Zań jobasyn qaraý barysynda depýtattar aktsız mólsherlemelerin satylap arttyrýdy kózdeıtin alkogol ónimderine aktsız mólsherlemeleriniń mólsherin belgileýdi usyndy. Jalpy zańsyz ónimder ımporty deńgeıiniń ulǵaıý múmkindigi jaǵdaıynda otandyq alkogol ónimderin óndirýshilerdiń básekege qabilettiligin arttyrý maqsatynda aktsız mólsherlemesin 100 paıyzdyq spırttiń 1 lıtrine 1600 teńgeden 1380 teńgege deıin 2016 jyly ǵana tómendetýdi usynamyz (2015 jylmen salystyrǵanda 15 paıyzǵa ósý). Bul jaǵdaıda jergilikti bıýdjetterdiń tolyq túspeýi 4 573,0 mln. teńgeni quraıdy. Atalǵan usynys kezekti úshjyldyq kezeńge (2017 - 2019 jyldar) arnalǵan jalpy sıpattaǵy resmı transfertter kólemi Bıýdjet kodeksine sáıkes 2016 jyly bekitiletindigimen túsindiriledi. Budan basqa, 2017 jyldan bastap bıýdjetaralyq qatynastar júıesin reformalaý jáne Eýrazııalyq ekonomıkalyq odaq sheńberinde aktsızderdiń mólsherlemelerin odan ári úılestirý kózdelýde. 2017-2019-jyldarǵa kúshti alkogol ónimderi aktsızderiniń mólsherlemelerin belgileýdi «100 naqty qadam» Ult josparynyń 44 jáne 45 - qadamdary sheńberinde 2016 jyly salyqtyq zańnamany reformalaý jáne bıýdjetaralyq qatynastardy jetildirý boıynsha zań jobasyn ázirleý kezinde qaraýdy usynamyz», - deıdi Ulttyq ekonomıka mınıstri Erbolat Dosaev.
Mınıstrdiń aıtýynsha, qujatty qabyldaý, eń aldymen, qolaıly bıznes-ortany qurýǵa, memlekettiń strategııalyq maqsattaryn iske asyrýǵa jáne odan ári turaqty áleýmettik-ekonomıkalyq damýy úshin yqpal etetin bolady.
