2016 jyl qazaqstandyqtardyń qaltasyna salmaq túsirdi
ASTANA. QazAqparat - 2016 jyly Qazaqstanda halyqtyń shynaıy tabysy 4,5 paıyzǵa qysqardy. Bul sońǵy 16 jyldaǵy eń joǵary quldyraý dep habarlaıdy QazAqparat ranking.kz saıtyna silteme jasap.
Statıstıkalyq málimetterge sáıkes, 2011-2015 jyldary Qazaqstanda eń tómengi kúnkóris deńgeıinen de kem tabys tabatyn halyqtyń sany kúrt qysqardy. Osy kezeńde olardyń sany 2 eseden astamǵa azaıdy. Degenmen, 2016 jyly bul protsess tek qana toqtap qoımaı keri úrdis qylań berdi. Máselen, 3 toqsannyń qorytyndysynda mundaı qazaqstandyqtardyń sany 452 myń adamdy qurady nemese 1 jylǵy burynǵy kórsetkishten 6 myń adamǵa kóp boldy. 2015 jyldyń 3 toqsanynyń sońyndaǵy deńgeımen salystyrǵanda az qamtylǵan qazaqstandyqtardyń sany 27 myń adamǵa kóbeıdi. Al osy kezeńde Qazaqstandaǵy aýqatty azamattardyń qatary 18,3 myń adamǵa kóbeıdi.
Qazaqstannyń aýqatty azamattarynyń 10 paıyzdan astamy halyqtyń barlyq tabysynyń 23,6 paıyzyna ıelik etedi. Bul rette Qazaqstandaǵy teńsizdik deńgeıi tómen (0,281) qalyp otyr. Degenmen, 2013 jylmen salystyrǵanda onyń kórsetkishi birshama ósken.
Qazaqstannyń eń kedeı turǵyndary elimizdiń myna ońtústik óńirlerinde turady: OQO (289,6 myń adam, 2016 jyldyń 3 toqsanysońyndaǵy derek), Almaty oblysynda (201 myń adam) jáne Almaty qalasy (175 myń adam).
Esterińizge sala ketsek, buǵan deıingi antırekord 2009 jyly belgilengen edi. Ol kezde halyqtyń shynaıy tabysy bir jylda 3,1 paıyzǵa kemigen bolatyn.
