2016 jyl eń ystyq jyl dep tanyldy
ASTANA. QazAqparat - 2016 jyl baqylaý júrgizilip kele jatqan 137 jyl ishinde eń ystyq boldy. Bul - klımattyń uzaqmerzimdi jahandyq jylynýymen baılanysty. Mundaı málimet beısenbi kúni jarııalanǵan AQSh-tyń teńizder men atmosferany zertteý jónindegi ulttyq basqarmasynyń baıandamasynda aıtylǵan.
«Klımattyń ahýaly» dep atalatyn jyl saıynǵy baıandamany daıyndaýǵa 60 eldiń 450 ǵalymy qatysty. Ondaǵy málimetterge súıensek, ótken jyly aýadaǵy parnıkti gazdardyń shoǵyrlanýy 58 jylda eń joǵary deńgeıde boldy, dep habarlaıdy TASS .
Jerdiń joǵary qabatynyń temperatýrasy sońǵy 30 jyl ishindegi ortasha kórsetkishpen salystyrǵanda bir jylda 0,45 - 0,56 gradýsqa joǵarylady. Onymen qosa, álemdik muhıttyń rekordty joǵary deńgeıi tirkeldi. Ol alǵashqy zertteýler ótkizilgen 1993 jylmen salystyrǵanda 82 mm-ge kóterildi.
