2016-2026 jyldarǵa arnalǵan Eýropa - Kavkaz - Azııa halyqaralyq kólik dálizin damytý strategııasy qabyldandy
ASTANA. QazAqparat - 2016 jylǵy 1 maýsymda Odessa qalasynda on ekinshi Úkimetaralyq TRASEKA komıssııasynyń otyrysy ótkizildi, dep habarlady QR IDM Baspasóz qyzmetinen.
Jıynǵa «Eýropa - Kavkaz - Azııa dálizin damytý boıynsha halyqaralyq kólik týraly negizgi kópjaqty kelisimniń» (NKK) taraptarynyń ókilderi, halyqaralyq uıymdar ókilderi qatysty.
Qazaqstan Respýblıkasynyń tarapynan Qazaqstan Respýblıkasy Investıtsııalar jáne damý mınıstrligi Kólik komıtetiniń tóraǵasy qatysty.
Úkimetaralyq otyrys sheńberinde TRASEKA halyqaralyq kólik dálizin damytý, halyqaralyq avtomobıl kóligimen tasymaldaýdy damytý Kontseptsııasyn júzege asyrý sharalary, TRASEKA avtomobıl kóligimen baǵyttardyń tartymdylyǵy men básekege qabilettiligin arttyrý máseleleri qaraldy.
Sonymen birge, taraptardyń 2021 jylǵa deıin TRASEKA aýmaqtyq qımyl strategııasynyń sharalaryn teńizde júzý men qorshaǵan ortanyń qaýipsizdigin qamtamasyz etýdi oryndaý júrisi talqylandy.
Úkimetaralyq otyrystyń ózekti máseleleriniń biri bolyp 2016-2026 jyldarǵa arnalǵan Eýropa - Kavkaz - Azııa halyqaralyq kóliktik dálizin damytý boıynsha strategııany qabyldaý boldy.
Strategııa dálizdiń kóliktik áleýetin tolyqtaı kólemde paıdalana otyryp, júktiń úzilissiz jáne kedergisiz qozǵalysyna múmkindik týǵyzýǵa, TRASEKA dálizin basqa halyqaralyq kólik dálizderine mańyzdy balama dáliz retinde róli men fýnktsııasyn ulǵaıtýdy qarastyrady.
Qazaqstan Respýblıkasynda «Nurly jol» baǵdarlamasy aıasynda, Transkaspıılik baǵytty odan ári damytý maqsatynda 2015 jyly keń aýqymda ınfraqurylymdyq jobalardy júzege asyrý bastalǵanyn atap ótý kerek.
Sonymen qatar, Qazaqstannyń teńiz porttarynyń ótkizý qabiletin arttyrý maqsatynda Aqtaý portynda jańa úsh qurǵaq júk termınaly salyndy jáne Quryq portyndaǵy paromdyq keshenniń qurylysy júrip jatyr.
2020 jylǵa deıin porttardyń ótkizý qabiletin jylyna 25 mln. tonnaǵa deıin arttyrý josparlanǵan.
Sondaı-aq, salynyp jatqan paromdyq termınaldy temirjol magıstralimen jalǵaıtyn Borjaqty - Ersaı temirjol jelisiniń qurylysy aıaqtaldy.
Sondaı-aq, Transkaspıılik halyqaralyq kólik marshrýtynyń Koordınatsııalyq komıteti jumysynyń aıasynda Qytaı-Qazaqstan-Ázerbaıjan-Grýzııa-Túrkııa qatynasynda jáne Qytaıdan Qazaqstan arqyly Iranǵa konteınerlik poıyzdar uıymdastyryldy.
Avtojol salasynda uzyndyǵy 7 myń shaqyrymnan asatyn 11 avtomobıl jolynyń jobasyn júzege asyrý kózdelgen.
Atalǵan jobalardy júzege asyrý tek, Qazaqstannyń ǵana tranzıttik áleýetin arttyra qoımaı, sonymen qatar TRASEKA-ǵa qatysýshy barlyq elderdiń halyqaralyq saýda-sattyǵyn damytý úshin úlken mańyzǵa ıe.
