2015 jyly zeınetaqy tólemderi 9 paıyzǵa artady
Qarjy mınıstri Baqyt Sultanovtyń aıtýynsha, 2015-2017 jyldar aralyǵynda álemettik qorǵaýǵa jumsalatyn bıýdjet shyǵystary 5 trln. 889 mlrd. teńgeni, onyń ishinde 2015 jyly - 1 713 mlrd. teńgeni quraıdy.
«Atap aıtqanda, 2015 jylǵy 1 qańtardan bastap zeınetaqylyq tólemder mólsherin 9 paıyzǵa, sondaı-aq memlekettik áleýmettik járdemaqylardy 7 paıyzǵa arttyrýǵa - 129 mlrd. teńge kózdeledi. Budan bólek, múgedektigi jáne asyraýshysynan aıyrylý jaǵdaıy boıynsha áleýmettik járdemaqylardyń 2015 jylǵy 1 shildeden bastap 25 paıyz artýyna - 23 mlrd. teńge, 2017 jylǵy 1 shildeden bastap eńbek ótilimine baılanysty bazalyq zeınetaqy taǵaıyndaýǵa - 137,4 mlrd. teńge qarastyrylyp otyr», - deıdi Qarjy mınıstri.
Onyń aıtýynsha, 2016 jyldan bastap kúsh qurylymdary salasyn zeınetaqylyq qamtamasyz etýdi reformalaýǵa 30 mlrd. teńge kózdeledi. Budan bólek, halyqty turaqty jumyspen qamtamasyz etý, sondaı-aq aýylda kásipkerlikti damytýǵa járdem kórsetý maqsatynda «Jumyspen qamtý-2020» jol kartasyn iske asyrý jalǵastyrylatyn bolady. Osy maqsatqa 2015-2017 jyldary 297 mlrd. teńge baǵyttaý qarastyrylǵan, onyń ishinde 2015 jyly jumsalatyn shyǵystar 92 mlrd. teńgeni quraıdy.