2015 jyly TKSh jańǵyrtý baǵdarlamasy aıasynda Astanada 31 turǵyn úı jóndeledi

ASTANA. QazAqparat - Búgin Astana qalasynyń ákimi Imanǵalı Tasmaǵambetov elordany jylýmen jáne elektr energııasymen qamtıtyn kásiporyndardy aralap, Turǵyn úı-kommýnaldyq sharýashylyǵyn jańǵyrtý baǵdarlamasyna qatysýshy turǵyn úılerdiń birinde boldy. Bul týraly ákimdiktiń baspasóz qyzmetinen habarlady.

Qazirgi kezde úıdiń tóbesi, qasbeti, kireberisteri men jertóleleri kúrdeli jóndeýden ótkizilip, ınjenerlik jelileri aýystyryldy. Nátıjesinde, turǵyn úıdiń kelbeti túbegeıli ózgerip, kireberisteriniń jaǵdaıy jaqsardy, al ınjenerlik jelileri uzaq ýaqyt boıy turǵyndarǵa sý men jylýdy úzdiksiz jetkizýdi qamtamasyz etedi.

«TKSh jańǵyrtý baǵdarlamasynyń qolǵa alynǵany durys, adamdar onyń tıimdi ári yńǵaıly ekenin túsinedi», - dedi Astana qalasynyń ákimi Imanǵalı Tasmaǵambetov.

Qazirgi ýaqytta TKSh jańǵyrtý baǵdarlamasy sheńberinde elordada 20 kóppáteri turǵyn úıge kúrdeli jóndeý júrgizildi. Sonyń ishinde 12 úı Almaty aýdanynda, 8-i Saryarqa aýdanynda ornalasqan. Jalpy, páterler sany 1 713 quraıdy.

Kelesi jyly Baǵdarlama aıasynda kúrdeli jóndeý júrgizýge (respýblıkalyq bıýdjet esebinen) 31 turǵyn úı ótinim bergen. Al jekelegen jóndeý jumystaryn júrgizý boıynsha (qaıtarylǵan aqshaǵa) 21 ótinim kelip túsken. Negizinen, 10 turǵyn úıdiń lıftisi aýystyrylyp, 11 úıdiń tóbesi jóndelmek.