2015 jyly salmonellez aýrýyn juqtyrǵan 100 tonnaǵa jýyq qus eti joıyldy - QR AShM

ASTANA. QazAqparat - Astananyń azyq-túlik qaýipsizdigin qamtamasyz etý maqsatynda QR AShM Veterınarııalyq baqylaý jáne qadaǵalaý komıtetiniń Veterınarlyq ınspektorlary otandyq jáne ımporttyq sapasyz mal sharýashylyǵy ónimderiniń saýda sattyq oryndaryna jol bermeý maqsatynda keshendi sharalardy atqarýda, dep málimdedi agrarlyq vedomstvoǵa siltememen primeminister.kz.

Sonymen, QR AShM málimetinshe, jyl basynan bastap, tekserý qorytyndysy boıynsha veterınarlyq ınspektorlarmen 3 mln teńge kóleminde 70 aıyppul salyndy. Onyń ishinde ilespe veterınarııalyq qujattary joq, shyqqan orny kórsetilmegen jáne avtokólikpen tasymaldaǵan kezde veterınarııalyq-sanıtarııalyq talaptardy saqtamaý buzýshylyqtary oryn alǵan.

«2015 jyldan bastap búgingi kúnge deıin laboratorııalyq zertteýler negizinde salmonellez aýrýy anyqtalǵan 98 tonna qus eti tárkilenip, joıyldy. Veterınarııalyq baqylaý jáne qadaǵalaý komıtetiniń ınspektorlary «Nurdaýlet», «Alem», «Astanalyq bazary» saýda úılerinen veterınarııalyq qujatsyz 60 kg-den asa qus etin tárkiledi. Polsha jáne Germanııa elderinen ákelingen 32 666,46 tonna sıyr baýyrynan Listeria monocytogenes jáne ishek taıaqshalarynyń bakterııalary anyqtaldy», - delingen habarlamada.

Qazaqstan Respýblıkasynyń memlekettiq basqarý deńgeıleri arasynda ókilettikterdiń arajigin ajyratý jónindegi sharalaryna saı veterınarııa salasyndaǵy fýnktsııalardyń barlyǵy jergilikti atqarýshy organdardyń qaramaǵyna berildi. Jalpy Astana qalasy boıynsha 14 ishki saýda obektisi bar.

«Barlyq ishki saýda oryndarynda veterınarııalyq mamandar bekitilgen. Olar baqylaýǵa jatqyzylǵan júkterge, memlekettik veterınarııalyq baqylaý júrgizip, arnaıy veterınarııalyq ilespe qujattaryn beredi, janýarlardy tekseredi, shıkizat ónimderin jáne basqa da ónimderdi baqylaıdy. Barlyq bazarlarda mal ónimderine saraptama júrgizetin arnaıy lıtsenzııasy bar veterınarlyq-sanıtarlyq zerthanalar qyzmet etedi», - delingen habarlamada.