2015 jyly munaıdyń álemdik baǵasy barreline 80 dollarǵa, 2016 jylǵa qaraı 90 dollarǵa boljandy - E. Dosaev
ASTANA. QazAqparat -2015 jylǵa munaıdyń álemdik baǵasy barreline 80 dollarǵa boljandy. Búgin Parlament Májilisiniń jalpy otyrysynda «2015-2017 jyldarǵa arnalǵan respýblıkalyq bıýdjet týraly» zań jobasy boıynsha baıandaǵan Ulttyq ekonomıka mınıstri Erbolat Dosaev osylaı málimdedi.
«Dúnıejúzilik banktiń derekterine sáıkes, kelesi jyly álemdik ekonomıkanyń ósimi ósýdiń uzaqmerzimdi orta qarqynynyń tórt paıyzyna jaqyndaıdy. Qalyptasyp jatqan syrtqy jáne ishki faktorlardy eskere otyryp, 2015-2019 jyldarǵa arnalǵan eldiń áleýmettik ekonomıkalyq damý boljamynyń bazalyq stsenarııiniń parametrleri qaıta qaraldy. Bul rette 2015 jylǵa arnalǵan munaı baǵasynyń boljamdy deńgeıi barreline 90 dollardan 80 dollarǵa deıin tómendetildi. 2016-2019 jyldarǵa arnalǵan munaı baǵasy barreline 90 dollar deńgeıinde saqtalady», - dedi mınıstr Erbolat Dosaev.
Onyń aıtýynsha, metall baǵasy kelesi jyly bıylǵy deńgeıde saqtalady, al 2019 jylǵa qaraı 5,4 paıyzǵa ósýi boljanady.
«Munaı óndirý deńgeıi elimizde buǵan deıin maquldanǵan kólemde saqtalady. 2015 jyly 81 mln 800 myń tonnany qurasa, 2019 jyly 96 mln. tonnaǵa deıin odan ári ulǵaıtylady», - dedi mınıstr E. Dosaev.
