2015 jyly memlekettik satyp alýlarda talaptardy jónsiz joǵarylatýdyń 400-ge jýyq oqıǵasy anyqtaldy
ASTANA. QazAqparat - Jyl basynan beri memlekettik satyp alýlarda talaptardy jónsiz joǵarylatýdyń 395 faktisi anyqtaldy.
Bul týraly búgin Ortalyq kommýnıkatsııalar qyzmetinde ótken brıfıngte QR Qarjy vıtse-mınıstri Rýslan Beketaev málim etti.
«Konkýrstyq qujattardy daıyndaýǵa keletin bolsaq, onda biraz máseleler bar, atap aıtqanda, konkýrstyq qujattardy belgili bir kompanııanyń múmkindikterine saı shaqtaý faktileri tyıylmaı keledi. 2015 jyldyń ózinde memlekettik satyp alýlarda talaptardy jónsiz joǵarylatýdyń 395 faktisi anyqtaldy. 40 memlekettik satyp alý konkýrsy jaramsyz dep tanyldy, 9 kelisimsharttyń kúshi joıyldy jáne 84 laýazymdy tulǵa ákimshilik jáne tártiptik jaýapkershilikke tartyldy», - dep atap ótti ol.
Vıtse-mınıstrdiń sózi boıynsha, osyndaı jáıttardy azaıtý maqsatynda bolashaqta baıqaý qujattarynyń tehnıkalyq erekshelikterin talqylaý men qujattardy standarttaý ınstıtýty zańnamalyq deńgeıde engiziledi. Tenderge qatysyp otyrǵan árbir kompanııa baıqaý qujattaryn zańda bekitilgen standarttarǵa saı ne saı emestigin qarap, qandaı da bir sáıkessizdik tapsa, sotqa júgine almaq.
«Sondyqtan biz tenderge qatysý jónindegi qujattardy tek elektrondy nusqada qabyldaý tetigin engizgen bolatynbyz. Ol bizge negizgi parametrlerdi baqylaýda ustap turýǵa múmkindik berdi», - dep atap ótti vıtse-mınıstr.
