2015 jyly kúnniń ystyǵynan 1,2 mıllıon adam zardap shekken
ASTANA. QazAqparat - BUU-nyń Tabıǵı apattardyń qaýipsizdigin tómendetý boıynsha Halyqaralyq strategııa mekemearalyq hatshylyǵy 2015 jyl - klımatty baqylaýǵa alǵan jyldar tarıhynda eń ystyǵy bolǵanyn málim etti.
Sarapshylar qazir jer betindegi tabıǵı apattardyń shamamen 90% klımattyń ózgerýimen baılanysty degen toqtamǵa keldi. Bul jıyrma jyl buryn bolǵan kórsetkishterden eki esege kóp.
Halyqaralyq uıymnyń jańa baıandamasynda 2015 jyly apattardan 98,6 mıllıon adam japa shekkendigi kórsetilgen. Tabıǵı apattardyń 92 paıyzy klımattyń ózgerýi saldarynan bolǵan.
Jańa baıandamada atalyp ótilgendeı, ótken jyly tabıǵı apattardan negizinen Qytaı, AQSh, Úndistan, Fılıppın jáne Indonezııada kóp tirkelgen.
Sý tasqynyna baılanysty apattardan 27,5 mıllıonǵa jýyq adam zardap shekti.
Eske sala ketsek, ótken jyly aýa raıyn baqylaý tarıhyndaǵy eń ystyq jyl retinde tirkeldi. Aptap ystyqtan álemde 1,2 mıllıon adam japa shekti. Ásirese Frantsııa, Úndistan jáne Pákistanda kún erekshe ystyq boldy. Kún ótip ketken ári ystyqty densaýlyǵy kótere almaǵan 7 346 adam qaıtys bolǵan.
