2015 jyly kórermenge jol tartatyn Qazaqstannyń 8 tól fılmi
Asqar Uzabaevtyń «Jol» (Pýt boksera) atty sporttyq dramasy kóshe tóbelesiniń jas ókili týraly baıandaıdy. Ol almatylyq «baraholkada» nápaqasyn taýyp júrip, túnde astyrtyn uıymdastyrylatyn erejesiz jekpe-jekterde baǵyn synap júredi. Ýaqyt óte kele kásipqoı bokstyń dańǵyl joly - onyń mańdaıyna jazylǵan taǵdyr ekenin uǵynady.
Qazaq kórermenderine tanymal bolǵan Ermek Tursynov «Kelin» jáne «Shal» kınotýyndylarynyń jalǵasyn bıyl túsirip bitpek. «Kenje» atty ekshn-trıller atalmysh trılogııanyń sońǵy bóligi bolmaq. Bul fılmde aǵa men ini arasyndaǵy tartys sýretteledi. Aǵasy adam óltirýge tapsyrys qabyldap otyrady, al ony oryndaıtyn - inisi.
Bıyl ekranǵa Ermek Shynarbaevtyń «Dala úni» (Golos stepı) romantıkalyq melordramasy jaryqqa shyǵady. Fılmniń basty rólin frantsýz akteri Jerar Deparde somdaıdy. Bul «Qazaqfılm» men frantsýz kınematograftarynyń birlesken jobasy. Týyndy jelisi boıynsha frantsııalyq Anatol esimdi akýstıka mamany men Abaı esimdi qazaq jigittiń aınalasynda órbıdi. Olar qyzyq jaǵdaıda kezdesip, odan shyǵar joldy birge tabady. Fılm Parıj ben Astana qalalarynyń rýhanı baılanysy týraly áńgimeleıdi.
Satybaldy Narymbetov kórermenderge «Amanat» kınosyn tartý etpek. Shyǵarma repressııaǵa ushyraǵan tarıhshy Ermuhan Bekmahanov pen Kenesary hannyń ult-azattyq qozǵalysy týraly.
Doshan Joljaqsynovtyń ekinshi rejısserlik eńbegi - «Qunanbaı» kórkem fılmi - qazaqtyń uly aqyny, jazýshy, aǵartýshy Abaı Qunanbaevtyń ákesi salǵan sara jol jaıynda.
Komedııa janrynan da bıyl kende qalmaısyzdar. Erlan Nurmuhambetovtiń «Jańǵaq aǵashy» (Orehovoe derevo) jáne «16 qyz» atty eki komedııa usynylmaq. Birinshi fılm kelindi urlap ketýmen baılanysty. Barlyǵy ananyń balasyna nemere súıý armanynan bastalady. Ary qaraı dostardyń kómegi, urys-keris, azdaǵan túıtkilder, toı jáne jańǵaqtar. Ekinshi fılmniń sıýjeti belgisiz. Sebebi ony «Qazaqfılm» «KANAIDAR Production» kompanııasymen birigip túsiredi.
Sonymen qatar bıyl «Elbasy joly» kınoepopeıasynyń jalǵasy túsirilmek.
