2015 jyly Qazaqstannyń sanavıatsııasy shetelden naýqastardy jetkizý úshin 10 ushyrylym jasady

ASTANA. QazAqparat - Medıtsınalyq qyzmet kórsetý maqsatynda Respýblıkalyq sanıtarlyq avıatsııa ortalyǵy 2015 jyly 2149 ushyrylym jasady. 2014 jylmen salystyrǵanda ushyrylymdar sany 274-ke nemese 13 paıyzdan astam kórsetkishke artty.

«Sanavıatsııa mamandary ótken jyldyń 12 aıynda 2704 medıtsınalyq qyzmet kórsetti. Onyń ishinde 2098 naýqas tasymaldanyp, 463-ine keńes berildi jáne 143 ota jasaldy. Sonymen qatar, 16 donorlyq aǵza tasymaldanyp, 1 bıomaterıal jetkizildi»,-dep atap ótilgen QR Densaýlyq saqtaý jáne áleýmettik damý mınıstrligi málimetinde.

Atalǵan merzim ishinde sheteldik emhanalar men medıtsınalyq uıymdardaǵy em qabyldap jatqan Qazaqstan azamattaryna Astana jáne Almaty qalalarynda emdeý sharalaryn jalǵastyrý úshin 10 ushyrylym jasalyp, tasymaldandy. Osy oraıda Bangkoktan (Taıland) jáne Seýlden (Ońtústik Koreıa) - 2 ushyrylymnan, Beıjińnen (Qytaı), Omby, Ekaterınbor qalalarynan (RF), Kelnnen (Germanııa), Kıevten (Ýkraına), Balı aralynan (Indonezııa) - 1 ushyrylymnan jasaldy.

Atap aıtqanda, sanıtarlyq avıatsııanyń mobıldik brıgadalary balalar jasyndaǵy patologııa, jaraqattanýshylyq, qaıǵyly oqıǵalar jáne ýlanýlar, akýsherlik-gınekologııalyq patologııalar, qan aınalymy júıesi aýrýlary, jańa týǵan nárestelerdiń patologııalary jáne ózge de aýrýlar boıynsha medıtsınalyq kómek kórsetti.

Sonymen birge, 2015 jyldyń qańtar-jeltoqsan aılarynda sanıtarlyq avıatsııanyń mobıldik brıgadalary ár túrli jaraqat alǵan 573 patsıentke, onyń ishinde jol-kólik apatynan zardap shekken 253 adamǵa medıtsınalyq kómek kórsetti.