2015 jyly qazaqstandyq polıtsııa 140 keli aýǵan geroınin tárkiledi - ІІM
ASTANA. QazAqparat - 2015 jyly qazaqstandyq polıtsııa 140 keli aýǵan geroınin tárkiledi. Bul týraly búgin Májiliste ótip jatqan Úkimet saǵatynda Іshki ister mınıstri Qalmuhanbet Qasymov málim etti.
«Byltyrǵy jyly jalpy alǵanda 3 myńnan astam esirtki qylmysy ashyldy, olardyń ishinde 2 100-i esirtkini satýmen baılanysty bolyp tabylady. Sonymen qatar, elimizde 35,5 tonna esirtki aınalymnan alyndy, onyń ishinde 140 kelisi - aýǵan geroıni», - dedi mınıstr Q. Qasymov.
Onyń aıtýynsha, byltyrǵy jyly Іshki ister mınıstrliginiń aıtarlyqtaı kúshi men quraldary Shý alqabynan ázirlengen marıhýana men gashısh esirtkisin taratýǵa qarsy kúreske jumyldyrýǵa májbúr boldy.
«Osy maqsatta jyl saıyn mamyr aıynan qarasha aıyna deıingi aralyqta Shý óńirinde aýqymdy operatsııalar ótkiziledi. Aıta keterligi, sońǵy jyldary iri kólemdegi aýǵan geroıniniń partııalaryn tárkileý jıilep otyr», dedi mınıstr.
