2015 jyly Qazaqstanda JІÓ-niń ósimi 1,5 paıyzdy quraıdy
ASTANA. QazAqparat - 2015 jyly Qazaqstanda JІÓ-niń ósimi 1,5 paıyzdy quraıdy dep baǵalanyp otyr. Bul týraly búgin QR Parlamenti Senatynyń jalpy otyrysynda QR Ulttyq ekonomıka mınıstri Erbolat Dosaev aıtty.
«JІÓ ósimi 2015 jyly 1,5 paıyz deńgeıinde boljanyp otyr, bul qarashadaǵy naqtylaýdan 3,3 paıyzdyq pýnktke (p.p.) tómen, al 2016 jyly 2,2% (3,1 p.p. tómen), 2017 jyly 3,3% (3,4 p.p. tómen), 2018 jyly 3,6% (2,2 p.p. tómen) jáne 2019 jyly 4,1% (2,4 p.p. tómen) bolmaq», - dep túsindirdi ol senatorlardy 2015-2019 jyldarǵa arnalǵan eldiń áleýmettik-ekonomıkalyq damýymen tanystyrý barysynda.
Mınıstrdiń naqtylaýynsha, 2015 jyly jan basyna shaqqanda 12,8 myń AQSh dollaryn kórsetip turǵan JІÓ 2019 jylǵa qaraı 17,6 myń AQSh dollaryna deıin kóbeıedi.
«Osydan shyǵatyny, 2015 jylǵy nomınaldy JІÓ 41 307,6 mlrd. teńge kóleminde josparlanyp otyr. Bul qarashadaǵy naqtylanǵan kórsetkishten 2 413,7 mlrd. teńgege tómen jáne 2019 jyly 59 869,9 mlrd. teńgege deıin kóbeıedi», - dep tolyqtyrdy E.Dosaev.
