2015 jyly Qazaqstan qytaılyq ınvestıtsııalar kólemi jaǵynan úzdik 5 eldiń qataryna kirdi

BEIJІŃ. QazAqparat - 2015 jyly Qazaqstan qytaılyq ınvestıtsııalar kóp salynǵan 5 úzdik eldiń qataryna kirdi. Bul týraly Qytaıdyń Kommertsııa mınıstrligine silteme jasaǵan «Sınhýa» habarlap otyr.

«Ótken jyly «Bir beldeý, bir jol» strategııasyn tolyq kólemde iske asyrý kezeńi bastaldy. QHR Kommertsııa mınıstrliginiń statıstıkasy boıynsha, 2015 jyly qytaılyq kásiporyndardyń «bir beldeý, bir jol» boıynda ornalasqan 49 eldegi ınvestıtsııalary 14,82 mlrd. dollardy quraǵan, bul bir jyl burynǵy kórsetkishten 18,2 paıyzǵa kóp. Negizinen ınvestıtsııalar Sıngapýr, Qazaqstan, Laos, Inlonezııa jáne Reseıge baǵyttaldy», - dep jazady basylym. Sondaı-aq bul tizimge Taıland ta kirdi.

Eske sala keteıik, óndiristik qýattylyqtardy damytý kontekstinde QHR Memlekettik keńesiniń premeri Lı Ketsıanniń Búkilqytaılyq halyq ókilderi jınalysynyń (BHÓJ) ashylýynda úkimet jumysy týraly oqyǵan baıandamasynda Qazaqstan  ataldy.