2015 jyly Qazaqstan Damý Bankiniń taza tabysy 7,9 mlrd teńgeni qurady - B. Jámishev

ASTANA. QazAqparat - 2015 jyly Qazaqstan Damý Bankiniń shoǵyrlanǵan taza tabysy 7,9 mlrd teńgeni qurady. Búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte «Qazaqstan Damý Banki» AQ Basqarma Tóraǵasy Bolat Jámishev málim etti.

Málimetterge qaraǵanda, QDB byltyr 42 jobany qarjylandyrýdy júzege asyrǵan.

«Jyl qorytyndysy aıasyndaǵy qarjylyq nátıjelerge kelsek, tutastaı alǵanda oń baǵalaýǵa bolady. Máselen, taza shoǵyrlanǵan tabys - 7,9 mlrd teńgeni qurady, bul aldyn ala belgili málimetter, naqty qorytyndy aýdıt nátıjesinde belgili bolady. Taza tabys jalpy somasy 47,7 mlrd teńgeni quraıtyn bes jobanyń talaptaryn qurylymdaý nátıjesinde qamtamasyz etildi», - dedi B.Jámishev.

Onyń aıtýynsha, atalǵan bes joba valıýtalyq túsimderden turady. Sondyqtan da, valıýtalyq baǵam ózgeristerine oraı jobalarǵa qatysty talaptar sheteldik valıýtadan ulttyq valıýtaǵa almastyrylǵan. Tutastaı alǵanda, bundaı qadam qarjylyq nátıjelerde oń jetistikterdi qamtyǵan.