2015 jyly Qazaqstan 60 mln. tonna munaı eksporttaıdy

ASTANA. QazAqparat - Bıyl Qazaqstan 60 mln. tonna munaı eksporttamaq. Bul týraly búgin Ortalyq kommýnıkatsııalar qyzmetindegi brıfıngte QR Energetıka mınıstriniń birinshi orynbasary Uzaqbaı Qarabalın málim etti.

«2015 jyly munaı óndirý 80,5 mln. tonna deńgeıinde josparlanyp otyr. Munaıdy óńdeý 14,3 mln. tonna kóleminde boljanýda. Al munaı eksporty 60 mln. tonna deńgeıinde belgilendi»,-dedi vıtse-mınıstr.

Budan buryn habarlanǵandaı, jaqynda Energetıka mınıstrliginiń keńeıtilgen alqa májilisinde osy vedomstvonyń basshysy Vladımır Shkolnık 2014 jyly Qazaqstan 62,4 mln. tonna munaı eksporttalǵanyn aıtqan bolatyn.

«Ótken jyly munaı eksportynyń kólemi 62,4 mln. tonnany qurady, onyń ishinde 35 mln. tonnasy Kaspıı qubyr jelisi konsortsıýmy qubyrynyń negizgi eksporttyq júıesi boıynsha»,- degen bolatyn vedomstvo basshysy.