2015 jyly Qazaqstan 12,7 mlrd. tekshe metr gaz eksporttady

ASTANA. QazAqparat - 2015 jyly Qazaqstan 45,3 mlrd. tekshe metr gaz óndirdi. Bul týraly búgin Ortalyq kommýnıkatsııalar qyzmetinde ótken baspasóz máslıxatynda QR Energetıka mınıstrligi gaz ónerkásibin damytý departamentiniń basshysy Ǵalym Nurǵazıev málim etti.

"Qazaqstan táýelsizdik alǵan kúnnen beri gaz óndirýdi 5,5 esege arttyrdy. 2015 jyly Qazaqstan 45,3 mlrd. tekshe metr gaz óndirdi. Bul 2014 jylmen salystyrǵanda 5 paıyzǵa kóp. Sonymen birge gaz eksportynyń da kólemi artqan. Byltyr Qazaqstan 12,7 mlrd. tekshe metr gaz eksporttady. Bul 2014 jylmen salystyrǵanda 15%-ǵa, 2000 jylǵa qaraǵanda 3,5 ese joǵary. Ol kezde tek 3,4 mlrd. tekshe metr gaz shetelge satylǵan bolatyn", - dep atap ótti ol.

Nurǵazıevtiń sózi boıynsha, ekonomıkanyń ósýine jáne úkimettiń eldi gazben qamtamasyz etý baǵdarlamasynyń arqasynda gazdyń ishki tutyný kólemi de artyp otyr. Byltyr eldiń ishki naryǵynda 12,1 mlrd. tekshe metr gaz tutynylǵan. Bul 2000 jylmen salystyrǵanda 2,2 esege kóp.