2015 jyly ІJÓ ósimi boljam boıynsha 1,5 paıyz bolady - UEM
ASTANA. QazAqparat - QR UEM boljamy boıynsha, 2015 jyly Qazaqstannyń naqty Іshki jalpy ónim ósimi 1,5 paıyz bolady. Bul buǵan deıin naqtylanǵan boljamnan 3,3 paıyzǵa tómen. Sonymen qatar, Іshki jalpy ónim 2016 jyly - 2,2 paıyz, 2017 jyly 3,3 paıyzǵa, 2018 jyly 3,6, 2019 jyly - 4,1 paıyzǵa boljanyp otyr. Bul týraly búgin Parlament Májilisinde «2015-2017 jyldarǵa arnalǵan respýblıkalyq bıýdjet týraly» zańǵa ózgerister men tolyqtyrýlar engizý týraly» zań jobasynyń tanystyrylymy barysynda QR Ulttyq ekonomıka mınıstri Erbolat Dosaev málim etti.
Mınıstrdiń aıtýynsha, boljamǵa saı 2015 jyly nomınaldy Іshki jalpy ónim 41 trln. 307 mlrd 600 mln. teńge shamasynda qalyptasady. Al ol kórsetkish 2019 jylǵa qaraı 59 trln 869 mlrd 900 mln teńgege deıin ulǵaımaq.
«Halyqtyń jan basyna shaqqandaǵy ІJÓ 2015 jyly 12,8 myń dollardy quraıtyn bolady, al bul kórsetkish 2019 jyly 17,6 myń dollarǵa deıin ulǵaıady», - dedi mınıstr Erbolat Dosaev.
Sonymen qatar, 2015-2019 jyldarǵa arnalǵan áleýmettik-ekonomıkalyq damýynyń naqtylanǵan boljamyna toqtalǵan Ulttyq ekonomıka mınıstri, munaı barreliniń baǵasy 50, 40 jáne 30 dollarǵa deıin jáne metalǵa baǵa ındeksi 5 paıyzǵa tómendeýi boıynsha Qazaqstan ekonomıkasynyń damý boljamy ázirlengenin atap ótti. «Bul rette barlyq úsh stsenarıı boıynsha da munaı óndirý kólemi 2015 jyly - 80,5 mln tonna, 2016 jyly - 80,8 mln tonna, 2017 jyly - 86 mln tonna, 2018 jyly - 90 mln tonna jáne 2019 jyly - 93 mln tonnany quraıdy. Jalpy, bazalyq stsenarıı boıynsha 2015-2017 jyldary munaı baǵasynyń bir barreli 80 dollardan 50 dollarǵa deıin, 2018-2019 jyldary barrel baǵasy 60 dollarǵa deıin tómendeıdi dep boljanǵan», - dedi mınıstr.
