2015 jyly elimizdegi mektep oqýshylary arasynda «Barsıada» ótetin bolady - A. Muhamedıuly
ASTANA. QazAqparat -Bilim jáne ǵylym mınıstrligimen, jergilikti atqarýshy bılikpen birlese otyryp, 2015 jyly elimizde «Barsıada» ótkizýdi josparlaımyz.
Búgin Parlament Senatynda sportty damytý máselelerine arnalǵan Úkimet saǵatynda Mádenıet jáne sport mınıstri Arystanbek Muhamedıuly osylaı málim etti. Eske salaıyq, Úkimet saǵaty «Qazaqstan-2050» strategııasyn júzege asyrý aıasynda buqaralyq sportty zańnamalyq qamtý máselelerine arnalǵan bolatyn.
«Atalǵan shara mektepter lıgasynyń aıasynda sporttyń 15 túrinen ótedi. Al búgingi kúni Bilim jáne ǵylym mınıstrligi tarapynan mekteptik jáne stýdenttik lıgalardy qalyptastyrý jumystary atqarylýda», - deıdi A. Muhamedıuly.
Mınıstrdiń sózine qaraǵanda, jyl basynan beri respýblıka aýmaǵynda 27 myń 655 buqaralyq sporttyq shara ótken, sonyń 17 myń 811-i aýylda júzege asty. Atalmysh sharalarǵa shamamen 3 mln. 363 myń adam qatyssa, sonyń 2 mln. 200 myńǵa jýyǵy aýyl turǵyndary.
«Shynyn aıtsaq, qazirgi tańda bizge sporttyq ǵımarattar jetispeıdi, halyq sportpen belsendi túrde aınalysa bastady. Astanadaǵy sporttyq ǵımarattardyń ózi 120 paıyzǵa deıin júktememen jumys istep otyr», - deıdi mınıstr.
