2015 jyly elimizde bala eńbeginiń eń nashar túrine 168 bala tartylǵan
Bilim jáne ǵylym mınıstrliginiń málimetterine sáıkes, 2015 jyly bala eńbeginiń eń nashar túrine 168 bala tartylǵan, 2010 jyldan bastap bul kórsetkish 3 eseden kóp tómendegen (553-ten 168-ge deıin).
Taldaý kórsetkendeı, búgingi tańda Qazaqstanda bala eńbegin zańsyz paıdalanýmen kúres úshin jetkilikti quqyqtyq negiz jasalǵany anyqtaldy.
Kámelettik jasqa tolmaǵandardyń quqyqtary men zańdy múddelerin jedel qorǵaý maqsatynda qurylǵan mobıldik toptardyń (quramynda eńbek ınspektsııasy, ishki ister, prokýratýra, jergilikti atqarýshy organdary, densaýlyq saqtaý, pedagog, psıholog mamandary bar) jumysy bala eńbegin zańsyz paıdalaný profılaktıkasynyń tıimdi quraldarynyń biri bolyp tabylady.
Máselen, Almaty qalasynyń prokýratýrasy 10 jastaǵy balanyń 4 jyl boıy mektepke barmaı, anasynyń janynda bazarda (baraholka) jumys jasaǵandyǵyn anyqtady. Prokýratýra aralasqannan keıin ol bala mektepke jiberildi.
Batys Qazaqstan oblysynda balalar men jasóspirimderge arnalǵan týberkýlezdi emdeý men saýyqtyrýǵa arnalǵan shıpajaı mektep-ınternatynda oqıtyn oqýshylardyń ózderine kúndelikti ylǵaldy jınaý jumystaryn júrgizýdi mindettegeni málim boldy. Prokýratýranyń qadaǵalaý aktisi boıynsha zańsyz tájirıbeniń joly kesildi.
Otbasydaǵy jaǵdaıdy turaqtandyrý maqsatynda profılaktıkalyq is-sharalar júrgizý úshin prokýratýra men ishki ister organdary nashar otbasylardy anyqtaý boıynsha aldyn-alý sharalaryn jandandyrdy. Ótken jyldan beri buryn esepke alynbaǵan myńnan asa otbasy anyqtaldy.
2015 jyly prokýratýra organdary bala eńbegin paıdalanýdyń profılaktıkasy men kámelet jasqa tolmaǵandardyń eńbek quqyqtaryn saqtaý máseleleri boıynsha barlyǵy 900-den asa balanyń quqyǵyn qorǵady (2014 jyly -629), biraqatar quqyqtyq túsindirý jumystaryn júrgizdi.
Taldaý qorytyndylary boıynsha bala eńbeginiń eń nashar túrine balalardyń tartylýyn anyqtaý, memlekettik organdardyń ózara árekettesýin qamtamasyz etý jónindegi jumystardy jandandyrý týraly quzyretti memlekettik organdarǵa hat jiberildi.
