2015 jyly bıýdjettegi tıimsiz ıgerilgen soma 232 mlrd.teńgeni qurady
ASTANA. QazAqparat - 2015 jyly respýblıkalyq bıýdjettiń tıimsiz ıgerilgen somasy 232 mlrd teńgeni qurady. Búgin Parlament Májilisinde 2015 jylǵy respýblıkalyq bıýdjettiń atqarylýy týraly Úkimet esebin tanystyrǵan QR Qarjy mınıstri Baqyt Sultanov osylaı málim etti.
«Tutastaı alǵanda bıýdjettiń ıgerilýi 99,8 paıyzdy qurady. Bul rette ıgerilmegen qarajattyń shamasy 7,8 mlrd.teńge bolsa, olardyń jartysynan astamy nemese 4,4 mlrd.teńgesi aǵymdaǵy jyly uzaqmerzimdi jobalar aıasynda ıgerý jalǵasady», - dedi mınıstr.
Onyń sózine qaraǵanda, ıgerilmegen somanyń negizgi bóligi Іshki ister mınıstrligine - 3,4 mlrd teńgeni quraǵan. Budan bólek, Aýyl sharýashylyǵy mınıstrligi men Densaýlyq saqtaý jáne áleýmettik damý mınıstrliginiń ıgermegen qarajaty 0,7 mlrd.teńgeni, Ulttyq ekonomıka mınıstrliginiń ıgermegen qarajaty 0,6 mlrd.teńgeni qurady.
«Biz bıyl alǵash ret bıýdjettik baǵdarlamanyń tıimsiz ıgerilgen somasyn keltirip otyrmyz. Esep komıtetiniń jáne Revızııalyq komıssııanyń esebinshe, bul 2015 jyly 232 mlrd.teńgeni qurady. Osynyń ózi onyń aldyndaǵy jylǵy baǵalaýmen salystyrǵanda 42 paıyzǵa tómen. Atalǵan soma kvazımemlekettik sektordaǵy qarajat qaldyqtarynan, ıgerilmegen somalardan, buzýshylyqtardan, ishki qarjylyq baqylaý arqyly anyqtalǵan qarajattar men paıdalanylmaǵan transfertter men kredıtterden quralyp otyr. Bul rette tıimsiz qarajattyń basym bóligi kvazımemlekettik sektordyń shottaryndaǵy qaldyqtardy quraǵanymen, olar da aldyńǵy jylmen salystyrǵanda úsh esege azaıdy», - dedi mınıstr.
