2015 jyly «Bolashaq» baǵdarlamasyna 15 mlrd. teńge bólindi - A.Sárinjipov

ASTANA. QazAqparat - 2015 jyly «Bolashaq» baǵdarlamasyna 15 mlrd. teńge bólindi. Bul týraly búgin Shetelde kadrlar daıarlaý jónindegi respýblıkalyq komıssııa otyrysy aldynda BAQ ókilderine suhbat bergen Bilim jáne ǵylym mınıstri Aslan Sárinjipov málim etti.

«Kelesi jylǵa «Bolashaq» baǵdarlamasyna shamamen 15 mlrd. teńge qarastyrylǵan. Bul qarjy sheteldiń joǵary oqý oryndarynda bilim alyp jatqan stýdentterdiń, sonymen qatar jańa stıpendıattardyń oqý aqysyn tóleýge jumsalady», - dedi mınıstr.

Onyń atap ótýinshe, atalǵan baǵdarlama boıynsha jylyna elimizdiń 2,5-3 myń stýdenti sheteldik bedeldi joǵary oqý oryndarynda bilim alady. «Solardyń oqýyna, jatyn ornyna, júrip-turýyna shamamen osyndaı qarjy bólinedi», - deıdi ol.

Jalpy, mınıstrdiń alǵa tartqan derekterine qaraǵanda, «Bolashaq» baǵdarlamasy qolǵa alynǵan 20 jyldyń ishinde elimizdiń 10 myńnan astam azamat shetelde sapaly bilim alyp qaıtqan.

«Oryn alý múmkin qarjylyq problemaǵa qaramastan bul baǵdarlama basym bolyp qala beredi ári qarjylandyrylady. Búginde biz onyń qaıtarymy bar ekendigin kórip otyrmyz. «Bolashaq» baǵdarlamasy boıynsha bilim alǵandardyń barlyǵy da 5 jyl boıy Qazaqstanda jumys isteýge mindetti. Eger, olar jumys istemeıtin bolsa, onda oqýǵa ketken qarjyny memleketke qaıtarady. Al olardyń sany biren-saran ǵana», - dedi A.Sárinjipov.