2015 jyly birde-bir gektar alqaptyń astyǵy qar astynda qalǵan joq - E.Sultanov
ASTANA. QazAqparat - 2015 jyly birde-bir gektar alqaptyń astyǵy qar astynda qalǵan joq. Búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte Soltústik Qazaqstan oblysynyń ákimi Erik Sultanov osylaı dedi.
Ákim óz sózinde buqaralyq aqparat quraldarynda jarııalanǵan «ótken jylǵy astyqtyń jınalmaı qar astynda qalyp, shirip ketti» degen aqparattyń jalǵan ekendigin atap ótti.
«Birden aıtaıyn, 2015 jyly birde-bir gektar alqaptyń astyǵy qar astynda qalǵan joq. Ótken brıfıngte de maǵan dál osy suraqty qoıǵan edi. Ol kezde men 2014 jyly 93 myń gektar alqaby qar astynda qalǵanyn aıtqanmyn. Óıtkeni, 2014 jyldyń egin naýqany barynsha qıyn bolǵan edi. Al aǵymdaǵy jylǵa qatysty aıtar bolsam, biz egistik jumystaryna daıynbyz», - dedi óńir basshysy.
Sonymen qatar E.Sultanov óz sózinde kóktemgi egistik jumystaryna qajetti tehnıkalyq 73 paıyzy daıyn ekendigin, bul kórsetkish naýryz aıynda 100 paıyzǵa jetkiziletindigin basa aıtty.
«Buǵan qosa, qazirgi ýaqytta shamamen 30 myń tehnıka daıyndalýda. Onyń 1200-iniń ónimdiligi óte joǵary. Olardyń árqaısysy 2-3 myń gektar alqaptyń astyǵyn orady. Bizdiń barlyq kombaındarymyz daıyn bolady. Eń bastysy aýa raıy qolaıly bolsa bolǵany», - dedi ol.
