2015 jyly asyl tuqymdy mal ósirý keshenderin qurý úshin 65 myńǵa tarta iri qara ákelindi
ASTANA. QazAqparat - 2015 jyly asyl tuqymdy mal ósirý keshenderin qurý baǵyty boıynsha 64,9 myń iri qara mal ákelindi.
Bul týraly búgin QR Aýyl sharýashylyǵy vıtse-mınıstri Gúlmıra Isaeva málim etti.
Vıtse-mınıstrdiń aıtýynsha, 2015 jyly asyl tuqymdy mal ósirý keshenderin qurý baǵyty boıynsha 64,9 myń iri qara mal ákelingen, bul - jospardyń 93 %-yn qurady.
«2015 jyly et óńdeý úlesi 31 paıyzdy qurady, sút óńdeý - 39 paıyz. Mal sharýashylyǵy ónimin tutyný qurylymynda ımport úlesi kemigen. Asyl tuqymdy maldy satyp alý kólemin azaıtý sheshimi shyǵaryldy. Sebebi qazaqstandyq asyl tuqymdy mal ósirý keshenderiniń maldaryna suranys artqan», - dedi G.Isaeva mınıstrliktiń alqa májilisinde.
Sonymen qatar, vıtse-mınıstrdiń sózine qaraǵanda, fermerlik sharýashylyqtardy damytýdy kózdeıtin «Sybaǵa» baǵdarlamasyn oryndaý jospardan 121 paıyzǵa asyp túsken.
«Búginde iri qaranyń 277 myń analyq basy satyp alynǵan. Mal bordaqylaý oryndaryn salý boıynsha - 177 myń malǵa jemdeý oryndary ashylǵan. Osy kórsetkishter boıynsha besjyldyq jospar barlyq óńirlerde artyǵymen oryndalyp otyr», - dep atap ótti G. Isaeva.
