2015 jyly álemdegi áıel depýtattardyń úlesi 22,6 paıyzǵa jetti - BUU

ASTANA. QazAqparat - Halyqaralyq qaýymdastyq parlamentterdegi genderlik teńdik jolynda alǵa jyljýda, biraq qarqyny báseń. 2015 jyly áıelder joǵary zań shyǵarýshy organdarda 22,6 paıyzy oryndy ıelengen. Osy kórsetkish jyl burynǵymen salystyrǵanda jarty paıyzǵa artty. Bul derek Parlamentaralyq odaqtiń esebinde jarııalandy.

Taıaýda Parlamentaralyq odaq 2015 jyly parlamentterdegi áıelder statıstıkasyna qatysty esebin jarııa etti. Ol Halyqaralyq áıelder kúni men 14 naýryzda Nıý-Iorkte BUU shtab páterinde ashylatyn BUU-nyń áıelderdiń jaı-kúıi jónindegi komıssııasy sessııasynyń ashylýyna oraılastyryldy.

«Bul parlamentarızm tarıhyndaǵy eń joǵarǵy kórsetkish. Alaıda 2015 jyly ósim qarqynynyń baıalaýy, áıel depýtattardyń sany 1,5 paıyzǵa artqan 2013 jylǵymen salystyrǵanda keıinge ketip bara jatqandyǵyn kórsetedi» , - delingen Parlamentaralyq odaqtyń esebinde.
Byltyr Meksıka, Fınlıandııa, Ispanııada ótken parlament saılaýlarynda áıelder 40 paıyz depýtattar ornyn ıelengen. Bul kórsetkish Qyrǵyzstan men Tájikstanda - 19 paıyz shamasynda, Ázerbaıjanda - 16 paıyzdan sál joǵary bolsa, Gaıtı men Mıkronezııada birde bir áıel depýtat saılana almapty.
Sarapshylar kvota belgileý sekildi ýaqytsha sharalar bıliktiń joǵary eshalonyndaǵy genderlik teńdikti qamtamasyz etýde jetistikterge jol ashady dep sanaıdy.

Jalpy alǵanda álem halqynyń 51 paıyzy áıelder bolsa da, bılik organdarynda olardyń úlesi az. Sońǵy 10 jylda parlamentarıı qyz-kelnshekter sany 6,4%-ǵa artqan.
Eske sala ketsek, Parlamentaralyq odaq 1889 jyly qurylǵan. Onyń maqsaty - álem parlamentteriniń múshederi arasyndaǵy jeke baılanystardy yntalandyrý jáne álemdegi beıbitshilik pen yntymaqtastyqty nyǵaıtý jónindegi birlesken qyzmetke olardy uıystyrý.