2015 jylǵy 1 qańtardan bastap jasyna qaraı tólenetin memlekettik járdemaqy kólemi 7 paıyzǵa artady
ASTANA. QazAqparat - Balaly otbasylarǵa tólenetin járdemaqy kólemi jyl saıyn 7 paıyzǵa artýda. Bul týraly QR Densaýlyq saqtaý jáne áleýmettik damý mınıstrliginiń selektorlyq rejimdegi alqa otyrysynda osy vedomstvonyń basshysy Tamara Dúısenova málim etti, dep habarlandy baspasóz qyzmetinen.
Mınıstrdiń sózine qaraǵanda, jyl saıyn 380 myń ana jáne 700 myńdaı bala 5 túrli járdemaqy alady. 2015 jylǵy 1 qańtardan bastap jasyna qaraı tólenetin memlekettik járdemaqy kólemi 7 paıyzǵa artady. Al 2015 jylǵy 1 shildeden bastap múmkindigi shekteýli azamattarǵa jáne asyraýshysynan aıyrylǵan otbasylarǵa tólenetin járdemaqy kólemi 7 paıyzǵa kóbeıip, ol 630 myń adamdy qamtıdy. Osylaısha atalǵan járdemaqylardyń jalpy ósimi 2013 jylmen salystyrǵanda 50 paıyzǵa jetedi.
«2017 jylǵy 1 qańtardan bastap tómengi kúnkóris deńgeıi 2014 jylmen salystyrǵanda 34 paıyzǵa artady. Nátıjesinde bazalyq zeınetaqy tólemderiniń kólemi 2016 jylmen salystyrǵanda 17 paıyzǵa ósedi», - dedi T.Dúısenova.
