2015 jylǵa qaraı Qazaqstandaǵy jańǵyrtylǵan munaı óńdeý zaýyttarynyń qýaty 17 mln. tonna ónim óńdeýge jetedi

Bul týraly búgin QR Parlamenti Májilisiniń jalpy otyrysynda «Munaı ónimderiniń jekelegen túrlerin óndirýdi jáne olardyń aınalymyn memlekettik retteý týraly» zań jobasy boıynsha baıandama jasaǵan Munaı jáne gaz mınıstri Saýat Myńbaev málim etti.

Jobany talqylaý barysynda mınıstr Qazaqstandaǵy munaı óńdeý zaýyttaryn jańǵyrtý týraly baǵdarlama 2009 jyly qabyldanǵanyn aıtyp ótti. «Bıyl Atyraý munaı óńdeý zaýytyn jańǵyrtý jumystary bastalyp otyr. Onyń bastapqy quny -1 mlrd. 200 mln. dollardy quraıdy. Sonymen qatar, jaqynda Shymkenttegi munaı óńdeý zaýytynyń tehnıkalyq ekonomıkalyq negizdemesi bitip, saraptamaǵa berilgen bolatyn. Al Pavlodar zaýytyn jańǵyrtýdyń tehnıkalyq-ekonomıkalyq negizdemesimen «Enı» kompanııasy aınalysyp jatyr. Bul da jyl sońyna qaraı bitýi tıis. Jalpy 2015 jylǵa qaraı osy úsh zaýyttyń jańǵyrǵan kezindegi tolyqtaı qýaty munaı óńdeý kólemin 17 mln. tonnaǵa jetkizedi», deıdi mınıstr Saýat Myńbaev. Onyń aıtýynsha, qazirgi ishki munaı naryǵynyń suranysy 13,5 mln. tonnany qurap otyr. «2015 jylǵa qaraı ózimiz óńdeıtin munaıdy 17 mln. tonnaǵa jetkizsek, ishki suranys tolyq ózimizden qamtylady dep oılaımyz», - dedi S. Myńbaev.