2015 jylǵa qaraı Qazaqstanda elektr energııasyn tutyný kólemi 100,9 mlrd. kVt/s-ty quramaq
ASTANA. 3 qazan. QazAqparat - 2015 jylǵa qaraı Qazaqstanda elektr energııasyn tutyný kólemi 100,9 mlrd. kVt/s-ti, al 2030 jyly 144,7 mlrd. kVt/s-ti quraıdy.
Bul týraly KAZENERGY VII Eýrazııalyq forýmynda «Samuryq-Energo» AQ-nyń basqarma tóraǵasy Almasadam Satqalıev málim etti.
Onyń sózinshe, elimiz ekonomıkasynyń ári qaraı damýyn qamtamasyz etý úshin elektr energııasyn óndirý kólemin 2030 jylǵa qaraı 150,2 mlrd. kVt/s-ǵa deıin jetkizý qajet. Onda 2030 jylǵa qaraı ishki qajettilikti tolyq qamtamasyz ete otyryp, eksport áleýeti 6 mlrd. kVt/s-ny quraıtyn bolady.
Osy oraıda atalǵan josparlardy júzege asyrý maqsatynda 2030 jylǵa deıin qoldanystaǵy qýattardy qalpyna keltirý jáne jańa nysandardyń qurylysy eskerilip otyr. Onyń ishinde taza kómir tehnologııasymen paıdalanylatyn jylý elektr stansalarynyń qýaty 7,2 GVt-ǵa artady.
