2015 jylǵa qaraı asyl tuqymdy maldyń úles salmaǵyn 3 esege arttyryp, 15 paıyzǵa jetkizý kózdeledi - A. Kúrishbaev
ANA. 8 qarasha. QazAqparat /Qanat Mámetqazyuly/ - Josparly sharalar júzege assa 2015 jylǵa qaraı asyl tuqymdy maldyń úles salmaǵy 3 ese artyp, ony 15 paıyzǵa jetkizýge múmkindik beredi.
Búgin Parlament Májilisinde elimizdiń mal sharýashylyǵyn damytý máseleleri taqyrybynda ótken Úkimet saǵatynda Aýyl sharýashylyǵy mınıstri Aqylbek Kúrishbaev osylaı málim etti.
Mınıstrdiń aıtýynsha, qazirgi tańda mal sharýashylyǵy salasynda maldyń genetıkalyq áleýetin arttyrý boıynsha 2 baǵytta jumystar atqarylýda. Birinshi baǵyt - iri kólemde selektsııa baǵdarlamasy aıasynda maqsatty selektsııalyq asyldandyrý jumystaryn júrgizý esebinen qolda bar mal basyn jaqsartý. «Sebebi selektsııalyq-asyldandyrý jumystary jónge qoıylmaǵan. Jergilikti jerlerde tuqymdyq buqalardy jáne olardyń uryqtaryn durys paıdalanbaǵandyqtan, 70 paıyz jaǵdaılar týystyq shaǵylysýǵa ákep soǵyp otyr. Nátıjesinde, maldyń ónimdiligi men asyl tuqymdylyǵy jaǵynan ázirge oń ózgerister baıqalmaıdy», - dedi mınıstr.
Onyń aıtýynsha, endigi kúni bul jaǵdaı túbegeıli ózgeristerge ushyraıdy. Bul rette keń aýqymdy selektsııa baǵdarlamasyn júzege asyrý kózdeledi. «Atap aıtqanda, buqanyń bir jynysty uryǵyn qoldaný jáne embrıondardy transplantatsııalaý sekildi bıotehnologııanyń óz tólinen ósirý ádisteri keńinen qoldanylatyn bolady. Ol óz kezeginde asyl tuqymdy maldyń kóbeıý koeffıtsıentin jáne tabynnyń jańarý úderisin jedeldetedi. Budan bólek, qazirgi ýaqytta iri kólemdi selektsııa baǵdarlamasy bastaldy jáne bul 850 aýyl sharýashylyǵy qurylymdaryn qamtıdy. Shara elimizdiń agrarlyq ǵylymynyń mamandanǵan ortalyǵynyń basshylyǵymen sheteldik ǵalymdardy tartý arqyly júzege asýda. Jalpy, baǵdarlamany iske asyrmas buryn damyǵan elderdiń tájirıbelerine súıendik. Atap aıtsaq, Germanııada soǵystan keıingi qysqa merzimde osy ádistiń negizinde mal sharýashylyǵynyń genetıkalyq qory qalpyna keltirilgen», - dedi A. Kúrishbaev.
Onyń aıtýynsha, qazirgi kúni keń aýqymdaǵy selektsııa baǵdarlamasymen iri qara mal ǵana qamtylǵan. Aldaǵy ýaqytta bul baǵdarlama mal sharýashylyǵynyń basqa da salalaryna engiziletin bolady. «Atalǵan sharalardyń bári 2015 jylǵa qaraı asyl tuqymdy maldyń úles salmaǵyn 3 ese arttyryp, 15 paıyzǵa deıin jetkizýge múmkindik beredi», - dedi A. Kúrishbaev.
