2015 jylǵa qaraı Astana halqy 1 mıllıondyq mejege jetip qalady - qala ákimi
ASTANA. 23 sáýir. QazAqparat /Jasulan Amanbaıuly/ - Aldaǵy 3-4 jyl ishinde elorda halqy 1 mıllıondyq mejege jetip qalýy yqtımal. Bul týraly búgin jýrnalısterge Astana ákimi Imanǵalı Tasmaǵambetov aıtty.
«Bizdiń elde ishki mıgratsııa óte belsendi túrde júrýde. Jyl saıyn qalamyzda 50 myńǵa jýyq adam tirkeledi. Búgingi tańda elordada 800 myńnan astam turǵyn bar. Aldaǵy 3-4 jyl ishinde qala 1 mıllıondyq mejege jetip qalýy yqtımal. Bul másele bizdiń kóńilimizdi qaladaǵy, birinshi kezekte, áleýmettik nysan qurylysyna úlken mán berý qajettigine aýdartady»,-dedi qala ákimi.
«Qaladaǵy demografııalyq ahýaldan tys, basqa óńirlerden Astanaǵa kóship kelip jatqandar qanshama. Osynyń negizinde bizde memlekettik qarajatty bólgizip, týyndaǵan óte qıyn ahýaldy sheshýge týra kelip jatady»,-dep atap kórsetti I. Tasmaǵambetov.
Onyń aıtýynsha, tek byltyrdyń ózinde Astanaǵa 3 myńnan astam mektep jasyndaǵy balalar kelgen. Úsh myń bala - eki jıyntyq mektepke para-par. Qala basshysynyń aıýynsha, 2020 jylǵa deıin qalada 38 mektep salynýy tıis.
«Osy baǵdarlama sheńberinde biz jumys jasap kelemiz. Elordada úsh aýysymmen oqıtyn, «tyǵyz» mektepter bar. Eki-úsh jyl ishinde biz qalada oqýshylardy úsh aýysymda oqytýdan arylamyz dep josparlaýdamyz»,-dedi I. Tasmaǵambetov.
