2015 jylǵa deıin monoqalalarda apatty úıler bolmaýy kerek - Óńirlik damý mınıstrligi
ASTANA. 14 naýryz. QazAqparat - 2015 jylǵa deıin monoqalalardy damytý baǵdarlamasy sheńberinde apattyq jaǵdaıdaǵy barlyq úıler joıylady. Bul týraly Rrimeminister.kz saıtyna suhbat bergen QR Óńirlik damý mınıstrliginiń Óńiraralyq damý jáne ekonomıkalyq aýdandastyrý departamentiniń dırektory Erasyl Jumanbaev málim etti.
«Monoqalalardaǵy apatty úılerdi joıýǵa 2013-2014 jyldaryna 1,5 mlrd. teńge qarastyrylǵan. Al monoqalalardy damytý baǵdarlamasyna sáıkes, 2015 jylǵa deıin apatty úıler bolmaýy kerek. Osylaısha, aldaǵy eki jylda apatty jaǵdaıda turǵan 179 úı joıylady»,- deıdi E.Jumanbaev.
Onyń aıtýynsha, búgingi kúni monoqalalardaǵy syrylyp tastaýǵa jatatyn úılerdiń jalpy sany 521-di quraıdy, onyń 179-y kommýnaldyq menshikte bolsa, qalǵany jeke menshikte. Al sol joıylýǵa jatatyn apatty 179 úıdiń basym bóligi Jańatas qalasyna (104 úı), Abaı qalasyna (56 úı), Qarataý (18 úı), Kentaý (1 úı) qalasynda ornalasqan. Budan bólek, Arqalyq qalasyndaǵy 117 úı ázirshe jeke menshiktiń ıeliginde qalyp otyrsa, sottarda 2 myńǵa tarta páterdi ıesiz dep taný týraly zańgerlik talap-aryzdar jatyr.
«Bul rette jergilikti atqarýshy organdar apatty jaǵdaıdaǵy úılerdi kommýnaldyq menshikke alý baǵytyndaǵy jumysty jandandyrýlary qajet», - deıdi E.Jumanbaev.
Toqtala ketetin jaıt, baǵdarlama aıasynda apatty úılerdiń ornyn jalǵa beriletin baspanalarmen almastyrý qarastyrylǵan. Osyǵan oraı, aǵymdaǵy jyly Rıdder qalasynda 12 besqabatty úıler turǵyzylady dep eseptelýde. Bul maqsatqa 1,2 mlrd teńge nysanaly transfert kózdelgen.
