2015 jylǵa deıin elimizde sottalǵandarǵa «elektrondy bilezik» engizý kózdeledi - Ádilet mınıstrligi
ASTANA. Tamyzdyń 26-sy. QazAqparat /Qanat Mámetqazyuly/ - 2015 jylǵy qańtardyń 1-ine deıin elimizdegi sottalǵandarǵa «elektrondy bilezik» engizý kózdeledi. Bul týraly búgin QR Ádilet mınıstrliginde ótken brıfıng barysynda vedomstvonyń resmı ókili Erbolat Erimbet málim etti.
Resmı ókildiń aıtýynsha, Memleket basshysynyń quqyq qorǵaý qyzmeti men sot júıesiniń tıimdiligin arttyrý jónindegi sharalaryna sáıkes, Ádilet mınıstrligi birqatar zań jobalarynyń tujyrymdamalaryn ázirlegen. «Máseelen, Ádilet mınıstrligi tarapynan bultartpaý sharalaryn qoldanýdy jetildirý máseleleri jónindegi zań jobasy daıarlanýda. Onda bostandyqtaryn shekteýge jáne shartty negizde sottalǵandarǵa elektrondy baqylaý quraldaryn (elektrondy bilezikterdi) engizý kózdeledi. Alaıda, bundaı quraldardyń qarjylyq shyǵyndary eskerile otyryp, ony engizý keıinge shegerilip otyr. Qajetti jaǵdaılar jasalsa, 2015 jylǵy qańtardyń 1-ine deıin bundaı elektrondy qural engiziledi», dedi E. Erimbet.
Sonymen birge, zań jobasynda basqa da sharalar qamtylady. Qujat qabyldanǵan jaǵdaıda birshama tıimdi máseler júzege asatyny kózdeledi. «Máselen, zań jobasy qabyldansa, elimizde túrmede otyrǵandar sany azaıady, sottalǵandarǵa qatysty baqylaý júıesi jetile túsedi, memlekettik qarjy shyǵyndar qysqarady», dedi E. Erimbet. Onyń aıtýynsha, sottalǵandardy elektrondy quraldar arqyly qadaǵalaý men baqylaý ornatýdy paıdalaný AQSh pen Eýroodaq elderiniń tájirıbelerinen alynǵan.
