2015 jyldyń sońyna deıin Ulttyq dárilik formýlıar ázirlenedi
ASTANA. QazAqparat - Bıyldyń sońyna deıin azamattarǵa dárilik zattardyń qoljetimdiligin qamtamasyz etýge jáne olardy tıimdi satyp alýǵa múmkindik beretin Ulttyq dárilik formýlıar ázirlenedi. Bul týraly búgin Ortalyq kommýnıkatsııalar qyzmetindegi baspasóz maslıhatynda QR Densaýlyq saqtaý jáne áleýmettik damý mınıstri Tamara Dúısenova málim etti.
«Dárilik zattardyń sapasyn, qaýipsizdigi men qoljetimdiligin qamtamasyz etý máselelerin sheshý maqsatynda 2015 jyldyń sońyna deıin Qazaqstandyq ulttyq dárilik formýlıar jasalatyn bolady», - dedi mınıstr.
Belgili bolǵandaı, QUF-qa negiz retinde álemde «altyn standart» bolyp esepteletin brıtandyq ulttyq dárilik formýlıar alyndy.
QUF Qazaqstanda tirkelgen barlyq dárilik zattardyń tizimin, olardyń klınıkalyq dáleldengen tıimdiligi, oryn alýy múmkin keri áseri týraly, árbir preparattyń shekti baǵasy jaıynda aqparatty qamtıtyn bolady. Osylaısha, ol tek dárigerler úshin emes, el azamattary úshin de úlken anyqtamalyq qyzmetti atqarmaq.
