2015 jyldyń sońyna deıin 11 sport túrinen 40-tan astam olımpıada lıtsenzııasyn utyp alýdy josparlaýdamyz - E.Qanaǵatov

ASTANA. QazAqparat - 2015 jyldyń sońyna deıin 11 sport túrinen 40-tan astam olımpıada lıtsenzııasyn utyp alýdy josparlaýdamyz. Bul týraly búgin QR Mádenıet jáne sport mınıstrligi men Qazaqstan Olımpıada komıtetiniń birlesken keńeıtilgen jınalysynda Sport jáne dene shynyqtyrý isteri komıtetiniń tóraǵasy Elsııar Qanaǵatov málim etti.

Onyń atap ótýinshe, aǵymdaǵy jyldyń 9 aıynda Rıo lıtsenzııasyn utyp alýǵa úmitkerler olımpıada oıyndaryna qatysýǵa múmkindik beretin reıtıngtik upaı jınaý úshin 347 oqý-jattyǵý jıynyna, 40-tan astam Azııa chempıonatyna, 28 lıtsenzııalyq álem chempıonatyna, 140-tan astam kópsatyly álem kýboktaryna qatysty. Nátıjesinde búgingi kúni 36 sportshy sporttyń 9 túrinen 33 lıtsenzııa utyp aldy.

«2015 jyldyń sońyna deıin bizderge taǵy da 2 álem chempıonatyna qatysý mindeti tur. Olar: aýyr atletıka men batýttan sekirý. Sonymen qatar sý polosynan Azııa chempıonatyna qatysýymyz qajet. Bul jarystardan keminde 10 olımpıada lıtsenzııasyn utyp alý oıda bar. Jalpy, 2015 jyldyń sońyna deıin 11 sport túrinen 40-tan astam lıtsenzııa utyp alýdy josparlaýdamyz», - dedi E.Qanaǵatov.

Komıtet basshysynyń aıtýynsha, aǵymdaǵy jyly jalpy josparlanǵan lıtsenzııalardyń 40 paıyzyn ıelik etýimiz qajet.