2015 jyldyń sońǵy 10 aıynda BJZQ zeınetaqy aktıvteriniń kiristiligi 10 paıyzdan asty - QR Ulttyq banki

ALMATY. QazAqparat - 2015 jyldyń 1 qańtary men 31 qazany aralyǵynda Biryńǵaı Jınaqtaýshy Zeınetaqy Qorynyń zeınetaqy aktıvteriniń kiristiligi 10,2 paıyzdy qurady. Bul týraly búgin QR Ulttyq bankiniń baspasóz qyzmetinen habarlady.

«2015 jyly QR Ulttyq Banki BJZQ zeınetaqy aktıvterin jalpy somasy 971,6 mlrd. teńgege ınvestıtsııalady, onyń ishinde:

Qazaqstan Respýblıkasynyń memlekettik baǵaly qaǵazdaryna salynǵan ınvestıtsııalar kólemi 419,0 mlrd. teńge (ortasha jyldyq tabystylyǵy 8,14 paıyz), kvazımemlekettik uıymdardyń baǵaly qaǵazdaryna salynǵan ınvestıtsııalar kólemi 105,1 mlrd. teńge (ortasha jyldyq tabystylyǵy 8,13 paıyz), ekinshi deńgeıdegi bankterdiń qarjy quraldaryna salynǵan ınvestıtsııalar kólemi 371,6 mlrd. teńge (ortasha jyldyq tabystylyǵy 9,03 paıyz), eýrooblıgatsııalarǵa salynǵan ınvestıtsııalar kólemi 70,1 mlrd. teńge (ortasha jyldyq tabystylyǵy 6,73 paıyz) jáne qazaqstandyq emıtentterdiń aktsııalaryna salynǵan ınvestıtsııalar kólemi 5,8 mlrd. teńge boldy», - delingen habarlamada.

Tutastaı alǵanda, Ulttyq Bank 2015 jyly júzege asyrǵan barlyq jańa ınvestıtsııalardyń kiristiligi jyldyq 8,33 paıyzdy qurady.

Aıta ketelik, búgingi tańda BJZQ zeınetaqy aktıvteriniń jalpy mólsheri 5,5 trln. teńgeni quraıdy.

Al 2014 jylǵy 1 qańtardan bastalǵan kezeńde BJZQ zeınetaqy aktıvteriniń kiristiligi 17,1 paıyz boldy.