2015 jyldyń qańtarynda Qazaqstanda jol apatynan 148 adam ajal qushty

ASTANA. QazAqparat - QR Bas prokýratýrasy Quqyqtyq statıstıka jáne arnaıy esepke alý jónindegi komıtetiniń málimetine sáıkes, respýblıka boıynsha 2015 jyldyń qańtar aıynda 1210 jol-kólik oqıǵasy (JKO) tirkeldi.

Bul rette, JKO saldarynan qaza bolǵan 148 adamnyń ishinde 18-i kámeletke tolmaǵandar, al 1589 jaraqat alǵandardyń arasynda 256-sy kámeletke tolmaǵan balalar men jasóspirimder.

JKO-da eń kóp qaza tapqandar sany Almaty (35 adam), Ońtústik Qazaqstan (23), Aqtóbe (15) oblystarynda tirkeldi. Eldi mekenderde -934, halyqaralyq, respýblıkalyq mańyzy bar joldarda - 120, oblystyq, aýdandyq mańyzy bar joldarda 63 jol-kólik oqıǵalary oryn alǵan. Eń qaýipti Almaty qalasynyń joldary bolyp otyr, onda adamdardyń opat bolýyna jáne jaraqat alýyna alyp kelgen 372 JKO boldy, sondaı-aq Ońtústik Qazaqstan - 157, Almaty-132, Shyǵys Qazaqstan oblystarynda 127 JKO bolǵan.

Atalǵan oqıǵalarǵa 1771 kólik quraldary qatysqan, onyń ishinde 1618-i jeńil avtokólikter, 89-y avtobýstar, 52-si júk kólikteri. Osy kólikterdiń jalpy sanynyń 77-si oń róldi avtomobılder.

Statıstıka kórsetip otyrǵandaı, jol apattarynyń sebepteri ózgerissiz kúıinde qalyp otyr. Burynǵysynsha JKO kóbinese Jol qozǵalysy erejelerin óreskel buzatyn júrgizýshilerdiń kinásinen oryn alýda. Máselen, júrgizýshilerdiń kinásinen 1135 jol apaty bolǵan.

Ótken jylmen salystyrǵanda JKO sany 12,6 paıyzǵa, ondaǵy qaza bolǵan adamdardyń sany 7 paıyzǵa tómendegenin atap ótken jón.