2015 jyldyń 9 aıynda elimizde 260 myń kólik tirkeldi
ASTANA. QazAqparat - Aǵymdaǵy jyldyń 9 aıynda elimizde 260 myń kólik tirkeldi. Bul týraly búgin QR Parlamenti Májilisinde ótken dóńgelek ústel barysynda QR ІІM Ákimshilik polıtsııasy komıteti tóraǵasynyń orynbasary Álibek Keńesbaev málim etti.
«Tek ótken jyly ǵana avtokólik sany 440 myń birlikke artty. Al 2015 jyldyń 9 aıynda tirkeýge alynǵan kólikterdiń sany 260 myńdy qurap otyr. Búgingi kúni elimizdiń avtomobıl parki 4,5 mıllıon kólik quralyna jetip otyr. Osydan 5-10 jyl buryn biz 2 mln. kólik týraly aıtqan edik. ıAǵnı, kólik ósimi 2 esege artqan», - dedi ol.
Tóraǵa orynbasarynyń sózine qaraǵanda, kólik sanynyń artýy jol-kólik apatynyń kóbeıýine túrtki bolady. Óıtkeni, elimizge ákelinetin kólikterdiń jartysyna jýyǵy tehnıkalyq turǵyda eskirgen ári qazirgi ýaqytta paıdalaný birshama qaýipti.
«Paıdalaný ýaqyty 20 jyldan asyp jyǵylatyn olar saldary aýyr jol apatynyń oryn alýyna túrtki bolýy múmkin. Óıtkeni, búgingi kúngi zamanaýı kólikterdi jabdyqtaý standarty bolyp sanalatyn qaýipsizdik jastyǵy, tejegishti buǵattaýǵa qarsy júıesi joq. Al bular tosyn oqıǵa kezinde júrgizýshi men jolaýshylardyń ómirin saqtap qalýǵa septigin tıgizedi», - dedi Á.Keńesbaev.
Aıta keteıik, buǵan deıin habarlaǵanymyzdaı, 2015 jyldyń 9 aıynda shamamen 14 myń jol-kólik apaty tirkelip, onyń saldarynan 1700-den astam adam qaza tapsa, 17 myńnan astamy jaraqat aldy. Jol-kólik apatynan qaza tapqandardyń árbir úshinshisi - jaıaý júrginshi.
