2015 jyldyń 11 aıynda Qazaqstandaǵy sanavıatsııa 2 myńnan astam ushyrylym jasady
Ótken jyldyń sáıkes kezeńimen salystyrǵanda ushyrylymdar sany 281-ge nemese 14 paıyzǵa artty. Bul týraly QR Densaýlyq saqtaý jáne áleýmettik damý mınıstrliginen habarlandy.
«Sanavıatsııa mamandary atalǵan merzim ishinde 2539 medıtsınalyq qyzmet kórsetti. Onyń ishinde 1962 naýqas tasymaldanyp, 441-ine keńes berildi jáne 136 ota jasaldy. Astana qalasynan 557, Almatydan 205, aımaqtardan 1244 ret ushaq ushyrylyp, aımaqaralyq 14 ushyrylym jasaldy»,-dep atap ótilgen vedomstvo habarlamasynda.
Sonymen birge, osy merzimde sheteldik emhanalar men medıtsınalyq uıymdardaǵy QR azamattary Astana jáne Almaty qalalaryna emdeý sharalaryn jalǵastyrý úshin tasymaldandy. Bangkoktan (Taıland) jáne Seýlden (Ońtústik Koreıa) - 2 ushyrylymnan, Beıjińnen (Qytaı), Omby, Ekaterınbor qalalarynan (RF), Kelnnen (Germanııa), Kıevten (Ýkraına), Balı aralynan (Indonezııa) - 1 ushyrylymnan jasaldy.
Sanıtarlyq avıatsııanyń mobıldik brıgadalary balalar jasyndaǵy patologııa, jaraqattanýshylyq, qaıǵyly oqıǵalar jáne ýlanýlar, qan aınalymy júıesi aýrýlary, jańa týǵan nárestelerdiń patologııalary jáne ózge de aýrýlar boıynsha medıtsınalyq kómek kórsetti.
Sonymen birge, 2015 jyldyń 11 aıynda sanıtarlyq avıatsııanyń mobıldik brıgadalary jol-kólik apatynan zardap shekken 234 adamǵa medıtsınalyq kómek kórsetti. Al 2014 jyldyń 11 aıynda jol-kólik apatynan zardap shekken 171 azamatqa medıtsınalyq kómek kórsetilgen bolatyn. Respýblıka boıynsha eseptik kezeńde jedel medıtsınalyq kómek 136 naýqasqa kórsetildi, bul jalpy kórsetilgen medıtsınalyq kómektiń 6 paıyzyn qurady. Respýblıkalyq emhana dárigerleri 45, aımaqtyq mamandar 91 ota jasady.
«Qazaqstanda sanıtarlyq avıatsııa brıgadalarynyń ushyrylymdary jyl sanap artyp keledi. Bul - respýblıkanyń shalǵaı aımaqtaryndaǵy kómekke zárý adamdarǵa jedel, asa bilikti, mamandandyrylǵan jáne joǵary mamandandyrylǵan medıtsınalyq kómektiń qoljetimdiligin dáleldeıdi»,-deıdi mınıstrlik ókilderi.