2015 jyldan bastap Ulttyq biryńǵaı testileý júıesi eki kezeńge bólinýi yqtımal
ASTANA. QazAqparat - 2015 jyldan bastap Ulttyq biryńǵaı testileý júıesi eki kezeńge bólinbek.
Bilim jáne ǵylym mınıstrliginen budan buryn habarlaǵandaı, qazirgi biryńǵaı test júıesi aıtarlyqtaı nátıje kórsetken joq. Óıtkeni, "mektepten alǵan bilimdi tek bir salada tolyq kórsetý múmkin emes".
Sondyqtan endi mektep túlekteri eki kezeńdik synaqtan ótedi. Aldymen olar birneshe pánnen jazbasha emtıhan tapsyrady. Al joǵarǵy oqý ornyna túser sátte keshendi testileýge qatysady. ıAǵnı, talapker aldymen attestat alý úshin mektep bitirý emtıhanyn tapsyrýy kerek. Al joǵarǵy oqý ornyna túsý úshin bólek synaqtan ótetin boldy. Ári ekeýi de avtomattandyrylǵan kompıýterlik ádispen júrgizilmekshi. Jalpy nobaıy jasalǵanymen, ázirge joba qurastyrylý ústinde.
Keshendi test eki beıindi pán boıynsha ótkizilýi múmkin. Sondaı-aq emtıhannyń ótý formasy da ózgeredi dep kútilýde. Atap aıtqanda, mátinmen jumys júrgizilip, biliktilikti tekseretin birneshe tapsyrmalar beriledi. Bul oqýshylardyń jattandy bilimin emes, ony is júzinde qanshalyqty paıdalana alatynyn anyqtaıdy.
"QazAqparat" agenttigi jaqyn ýaqyttary UBT-da oryn alýy yqtımal reformalar jaıynda QR Bilim jáne ǵylym mınıstrligine resmı saýal jasaıdy jáne osy saladaǵy ózgerister men jańashyldyqtardy baqylap otyrmaq.
