2015 jyldan bastap túlekterdiń attestatyna baǵa men UBT balynyń ortasha arıfmetıkalyq máni qoıylady - QR BǴM
ASTANA. QazAqparat - Bıylǵy jyldan bastap qazaqstandyq mektepterdiń barlyq túlekteriniń attestatyna pán boıynsha jyldyq baǵa men Ulttyq biryńǵaı testileýden alǵan baldyń ortasha arıfmetıkalyq baǵasy qoıylady, dep habarlady Úkimet basshysynyń saıty.
Bul týraly Qazaqstan Respýblıkasy Bilim jáne ǵylym mınıstrliginiń Bilim jáne ǵylym salasyndaǵy baqylaý komıtetiniń tóraǵasy Saıat Núsipov OKQ brıfınginde málim etti. «Testilik pánder boıynsha ortasha arıfmetıkalyq mán engizemiz, ol baǵa túrinde attestatqa qoıylady. Bul burynnan beri pisip-jetilgen túzetý, búginde ol júzege asyrylyp, mınıstrlik tıisti buıryq shyǵardy», - dedi S.Núsipov.
Ol mundaı ózgeris túlekterdiń bilimin ádiletti baǵalaý úshin qajet ekenin atap ótti. Sebebi «jaqsy» jáne «úzdik» oqıtyn oqýshy psıhologııalyq jáne basqa da sebepter boıynsha UBT-den tómen ball alyp qalýy múmkin.
«Eger oqýshy UBT-den «3» degen baǵaǵa sáıkes ball alsa, onda attestatqa mekteptegi joǵary baǵany eskere otyryp, «4» degen baǵa qoıylady. Al, «úzdik» oqıtyndarǵa qatysty eger oqýshy mektepte bestik degen baǵalar alyp kelip, UBT-de «4» alsa, endeshe attestattyń ortasha baly 4,5 bolyp, attestatqa «5» degen baǵa qoıylady», - dep túsindirdi komıtet basshysy.
Oǵan qosa, S.Núsipovtiń aıtýynsha, bul ózgeris mektepte jaqsy baǵa almasa da, shpargalka nemese ereje buzyp UBT-den jaqsy ball alý múmkindigin joıýǵa kómektesedi.
