2015 jyldan bastap shegirtke zııankesteriniń taralý aýmaǵy azaıady

ASTANA. QazAqparat - QR AShM úıirli shegirtkelerge qarsy kúresýde jańa tehnologııalardy qoldanýda. Osy oraıda sarapshylardyń boljamy boıynsha 2015 jyldan bastap shegirtke zııankesteriniń taralý aýmaǵynyń azaıýy kútilýde.

Atap aıtqanda, olardyń taralýynyń shyrqaý shegi 2014 jyly boldy.

«Bıyl úıirli shegirtkelerdiń 3,8 mln. gektar jerde taralýy boljanyp otyr, sonyń ishinde ıtalıandyq prýs - 3,2 mln. gektar, azııalyq shegirtke - 541,9 myń gektar, marokko shegirtkesi - 100,1 myń gektar aýmaqqa taralýy múmkin»,-delingen mınıstrlik málimetinde.

Belgili bolǵandaı, shegirtkelermen kúresý is sharalaryna respýblıkalyq bıýdjetten 3,7 mlrd. teńge, sonyń ishinde pestıtsıdter satyp alýǵa - 721 mln. teńge jáne hımııalyq óńdeý júrgizýge 3 mlrd. teńge bólinip otyr. Búginde konkýrstar ótkizilip, pestıtsıdterdi usynýshylar, olardy saqtaý, tasymaldaý jumystaryn oryndaýshylar jáne óńdeý jumystaryn júrgizýshiler anyqtaldy. Qazirgi kezde barlyq usynýshylar jáne jumysty oryndaýshylarmen kelisimsharttar jasalýda.

Aıta keteıik, 2015 jyly úıirli shegirtkeniń taralý qaýipi joǵary 39,2 mln. ga jerde monıtorıngtik tekserý jumystaryn júrgizý josparlanyp otyr. Kórshi eldermen arada másele týyndatpaý úshin, Qytaı, Reseı, Ózbekstan jáne Qyrǵyzstanmen shekaralas jerlerde shegirtkelerdi anyqtaý maqsatynda jáne óńdeý jumystarynyń tıimdiligin bilý úshin birlesken tekserý jumystary júrgiziledi. Ár kezeń aıaqtalǵannan keıin birlesken zertteý aktilermen hattamalar ázirlenbek.

Qazirgi kezde Ońtústik Qazaqstan oblysynda marokko shegirtkesi boıynsha aýmaqty zertteý jumystary júrgizilip jatyr.