2015 jyldan bastap memlekettik qyzmetshilerge qazaq tilin meńgerý mindetteledi - Mádenıet mınıstri

ASTANA. QazAqparat - Búgin Úkimet otyrysynda Tilderdi damytý men qoldanýdyń 2011-2020 jyldarǵa arnalǵan memlekettik baǵdarlamanyń oryndalý barysy qaraldy. Bul týraly búgin Ortalyq kommýnıkatsııalar qyzmetinde ótken brıfıngte QR Premer-Mınıstriniń orynbasary Gúlshara Ábdihalyqova málim etti.

"Qazirgi ýaqytta sarapshylar aıtyp otyr, memlekettik tildi meńgerýde Qazaqstan halqynyń 62-63 paıyzy qazaq tilin, 92 paıyzy - orys jáne 16,6 paıyzy aǵylshyn tilin meńgergen. Elbasynyń qoıyp otyrǵan saıasaty - elimizde úsh tuǵyrly tildi damytý. Osyǵan baılanysty búgin Úkimet otyrysynda baǵdarlamanyń oryndalý barysy talqylandy", - dep atap ótti ol.

Brıfınge qatysqan QR Mádenıet mınıstri Arystanbek Muhamedıuly baǵdarlama aıasynda jasalǵan jumystardyń naqty kórsetkishterine toqtaldy. "Esepti kezeńde memlekettik tildi damytý men qoldanýǵa baǵyttalǵan birqatar jumys atqaryldy. Atap aıtqanda, QAZTEST júıesin jetildirý boıynsha memlekettik tildi oqytýǵa arnalǵan 5 deńgeıden turatyn oqý-ádistemelik keshen ázirlendi. Sonymen qatar elimizdiń barlyq tilderdi oqytý ortalyqtaryna taratyldy. Endigi kezekte memlekettik qyzmetshilerge qazaq tilin meńgerýdi mindettegen durys. Muny 2015 jyldan bastap ortalyq jáne jergilikti atqarýshy organdardyń strategııalyq josparlaryna satyly túrde QAZTEST júıesin engizý arqyly sheshemiz", - dep atap ótti mınıstr.

Onyń aıtýynsha, qazirgi ýaqytta elimizde 351 tildi oqytý ortalyqtary bar. Bul salaǵa jeke kásipkerlerdiń qyzyǵýshylyǵy da artqan.