2015 jyldan bastap Qazaqstanda teńizshilerge kýálik berilmek
ASTANA. QazAqparat - Qazaqstanda teńizshiler kýáligin berý 2015 jyldan bastalady, dedi QR Investıtsııa jáne damý mınıstrliginiń Kólik komıtetiniń tóraǵasy Áset Asaýbaev «Sý kóligindegi qaýipsizdikti qamtamasyz etýdiń mańyzdy máseleleri» atty halyqaralyq ǵylymı-tájirıbelik konferentsııa barysynda.
«Teńizshiniń jeke basyn kýálandyratyn qujattar týraly №185 konventsııany júzege asyrý maqsatynda sáıkes qurylǵy, baǵdarlamalyq qamtamasyz etý satyp alynyp, málimetter bazasy qurylady», - dep habarlady Áset Asaýbaev. Onyń sózine qaraǵanda, teńizshilerge kýálik daıyndap, ony berý júıesin qurý úshin Reseı porttarynda osyndaı ispen aınalysatyn kompanııa tartyldy. «Kýálikter kelesi jyldyń basynan bastap beriledi dep uıǵarylyp otyr», - dep qorytyndylady Kólik komıtetiniń tóraǵasy.
