2015 jyldan bastap Qazaqstanda mektepter 12 jyldyq bilim berýge kóshedi

«12 jyldyq bilim berýge kóshý jaǵdaıynda ádistemelik qyzmetterdiń jumysyn jobalaý» taqyrybyndaǵy sektsııa 12 jyldyq bilim berýge kóshý kezinde júrgizilgen 10 jyldyq eksperımenttik jumystardyń qorytyndysyn shyǵarýǵa arnalǵan.

«Astana da basqa qalalar sekildi tájirıbege qatysady. Bıyl qaladaǵy 8 mekteptiń 12 jyldyq bilim berý úlgisin engizý tájirıbesine qatysqanyna 10 jyl boldy, al 2015 jyldan bastap, balalar birinshi synypqa 6 jasynan baratyn bolady», - dep habarlady astana.kz saıtyna «12 jyldyq bilim berý júıesin qoldaý jáne aǵylshyn tili ortalyǵynyń» dırektory Baqyt Túlkibaeva.

Otyrys barysynda 12 jyldyq bilim beretin mektepte joǵary synyp oqýshylaryn oqytý erekshelikteri, muǵalimderdiń biliktiligin arttyrý deńgeıli baǵdarlamasynyń negizderi men mindetteri, 12 jyldyq bilim berýge kóshý jaǵdaıynda mektepterde úılestirý keńesin qurý, eksperımenttik synyptardaǵy oqý-tanymdyq qyzmetti jandandyrý jáne t.b. máseleler qaraldy. Sektsııa aıasynda «Astana mektepterinde 12 jyldyq bilim berý úlgisin engizý tájirıbesi» kórmesi uıymdastyryldy, «Kásibı bilim berý: eresek ómirge qadam» baspa ónimderi jáne elordalyq bilim júıesi týraly fılm kórsetildi. Budan basqa, №5 gımnazııanyń 7-shi synyp oqýshylary - «Tabıǵı-matematıkalyq tsıkl pánderin aǵylshyn tilinde oqý» ilki jobasyna qatysýshylar fızıkadan zertteý jumystaryn aǵylshyn tilinde tanystyrdy.

Sektsııa jumysyna Qazaqstannyń óńirlerinen kelgen bilim qyzmetkerleri qatysty.

Eske salaıyq, 2003 jyldan bastap Astanada 8 mektepte (№ 18, 38, «Kógildir jelken», №3, 4, 35, 16, 32) 12 jyldyq bilim berý úlgisin engizý tájirıbesi qolǵa alyndy. Tájirıbege 123 oqýshy qatysady, atalǵan mektepterde 147 muǵalim sabaq beredi.